Wenczeslaus, sancte sedes apostolice prothonotarius, decanus Pataviensis ac iurium et fructuum camere apostolice debitorum per civitatem, diocesim et provinciam Salczeburgensem collector generalis, a sede apostolica predicta specialiter deputatus. Quia honorabilis vir domnus Martinus Ramel, vicarius chori Pataviensis prefate ac rector parrochialis sancte Margarete in Altkchoven, Pataviensis diocesis ecclesiarum, de et super mediis fructibus primi anni occasione dicte sue ecclesie parrochialis in Altkchoven, quam fuit pacifice assecutus, nobiscum nomine camere apostolice antedicte dudum pro octo florenis auri de camera ad certum terminum solvendos concordavit. Cum eciam dictus domnus Martinus eosdem octo florenos in eodem termino sibi per nos statuto nobis nomine camere apostolice supradicte exsolvit ac realiter tradidit et assignavit, idcirco ipsum domnum Martinum et beneficium huiusmodi ac omnia bona sua mobilia et inmobilia, presencia et futura, pro eisdem octo florenis sic ut prefertur, per nos receptis, dicta auctoritate quittamus, liberamus et absolvimus ac quittum, liberum et absolutum pronunciamus et declaramus in hiis scriptis cum pacto de ulterius non petendo, harum testimonio litterarum sigilli nostri appressione munitarum. Datum Patavie die decima nona mensis septembris anno domini quadringentesimo duodecimo, indiccione quinta, pontificatus sanctissimi in Christo patris et domni nostri domni Johannis, divina providencia pape vicesimi tercii anno tercio.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 706f, Nr. 561