Ich Elspet, Ulreichs Schawr tochter, vergihe und tun kunt offenlich mit dem prief allen den, so er furpracht und geczaigt wirt, das ich mit wolbedachtem muet und mit gutem willen aller meiner erben und nagsten freunt recht und redlichen ze rechtem kauff verkauft han meinen drittail mit aller zugehorung, so ich gehabt han an dem gut im Tal, gelegen in Visschenhaimer pharr, und mein rechts erib gewesen ist von dem wirdigen gotshaus ze Lambach, und den benanten meinen drittail ze kauffen geben dem erwirdigen meinem gnadigen hern hern Jacoben, abbt ze Lambach, umb ein gelt, des ich gantz und gar ^pin von im verricht, gewert und beczalt ze rechten tagen an schaden, und han im das geben auz meiner nutz und gewer in sein nutz und gewer mit allen eren nutzzen und rechten, so von alter und durich recht darzu gehort und davon bekomen mag ze haws, ze hof, ze hofmarich, ze holtz, ze veld, ze wismad, ze waid, versucht und unversucht, nichts ausgnomen in dhainerlay weis; ich pin auch mit allen meinen eriben des benanten drittails mit aller zugehorung ze rechtem kauff des egnanten meines gnadigen hern des abbts ze Lambach rechter gewer und furstand fur all ansprach an aller stat als offt im des mit recht not und durft geschiecht also rechts kaufs nach des lannds recht ist ob der Enns. Gienng im daran mit recht icht ab, das schol er alles haben datz mir meinen trewen und auf aller meiner hab, nichts ausgnomen, der schol und sich seim anwalt an seiner stat darumb undertzihen und underwinden an alles berechten, wo ich die han und als lanng innhaben untzt er schaden und haubt guts zalt und gewter wirt, des alles ze urchund geb ich im den prief, versigelten mit der erbern Hannsen des Rathalminger und hannsen des Pawswecken eigen anhangunden insigeln, die sie durich meiner vleissigen pet willen ze zeugnus an den prief gehanngen habent, in und iren erben an schaden, und bebeschehen ist nach Christi geburde viertzehenhundert jar und darnach in dem zwelifften jar an suntag vor sunwenden.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 700f, Nr. 557