Wir Jacob von Gots gnaden abbt ze Lambach und der gantz convent desselben klosters vergehen und tun kunt offenlich mit dem prief allen den, so er furpracht und geczaigt wirt, das fur uns komen ist Helmhart und alle seine geswistred, Chunrats von Haindorff saligen kinder, und habent uns redleichen erweiset und ermanet mit urchund, so sew gehabt habent von unserm vorsidel abbt Hannsen saliger gedechtnuss uber die hueb dacz Hayndorff mit aller zugehorung in Pennewannger pharr gelegen, das dieselb ir aller rechts vaterleichs erib ist und von unserm gotshaus eribrecht. Also habent wir mit veraintem rat dem benanten Helmharten und allen seinen geswistreden, nymand ausgnomen, Chunraten von Hayndorff saligen kinder und derselben allen eriben die ebenanten hueb verlihen ze rechten eribrecht und eingeantwurt in ir aller nutzz und gewer mit allen eren, nutzzen und rechten, so von alter und durich recht darzu gehort und davon bekomen mag ze haws, ze hof, ze hofmarich, ze holtz, ze veld, ze wismad, ze waid, versucht und unversucht, nichts ausgnomen in der beschaiden, das sew uns und unserm gotshaus jarleichen und alle jar davon raichen und dynen sullent an unser frawen ze der dinstzeit ein halbs phunt newer Wienner phennig, drew huener, und an sand Jorgen tag zehen Wienner phennig ze vogtstewr. Wir offen, sew sullent die benanten hub stiftleich und pawleich haben und dhainerlay wanndlung damit nicht haben, weder mit versetzzen, noch mit verkawffen noch in ander dhainerlay weise an unser hannt und guten willen, und sullent auch alles das davon leiden und dulden gein uns und unserm gotshaus, das ander unsers gotshaus eribler gein uns leident und duldent unvertzigen aller ander unsers gotshaus rechten in allen sachen. Und des alles ze urchund geben wir in allen den prief versigelt mit unserm und unsers convents paiden anhangunden insigeln nach Christi geburde viertzehenhundert jar und darnach in dem zwelifften jar an nagsten phintztag vor sand Barbare tag der heiligen jungkfrawen.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 711f, Nr. 566