Dem erwirdigen geystleichen herren hern Jacoben, abpt ze Lambach, enpewt ich Thoman Zehentner und mit sampt mir all mein erben unser willig gehorsam dinst. Wir lassen ewr genad wissen, daz wir dy Spekchwissen haben verchawft, dy gebn ^gelegen ist in Newnchiricher pharr und dy lechen ist von ewern genaden und von dem goczhaws daselbz. Dye selbig Spekchwis haben wir verchawft dem hoff smid cze Lambach und allen sein erben und pitt ewch mit fleizz, daz ir ym und sein erben dy selben wizz leicht, daz ist mein und meiner erben gutleicher will und wart, und gib ewch dy auf mit chraft dez priefs. Und pey dem chawff sind gewesen Hanns von Zeyllach der Chottpawr und Ulrich von Hefftperig und der plab Fridel und Wernhart Wurczgarten und Meinhart der Schuthuet, all drey purger ze Wels, dy dez chawfs angedachtig sind. Und dez ze urchundt so gib ich fur mich und all mein erben den prieff, versigelt mit dez erbern Thoman dez Aytterwekchen ze Wels aigen awfgedrukchtem insigel, der daz dar awfgedrukcht hat durich unser fleissigen pett willen, im und allen seinen erben an schaden, dar under wir uns verpinten mit unsern trewn an aydes stat, under daz insigel allez daz war und stat ze haben und geschriben stet an dem prief, der geben ist an der aindleff tawsent maydtag anno domini m^o cccc^o xiii^o jar.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 716f, Nr. 570