Wir Jacob von Gotes gnaden abbt ze Lambach vergehen und tun kunt offenlich mit dem brief allen, den er furkumbt, das fur uns komen ist Heinreich Kagerl und hat wolbedachtlich mit veraintem rat und gutem willen seiner hausfrawen und aller irer baider erben ze der zeit und er ez rechtlich und wol tun mocht, recht und redlichen verkauft das halb Nyder lehen am Veld mit seiner zugehorung, gelegen in Gunskircher pharr, das er auch kauflich in sein gewalt bracht hat vom Hennslein Gennglein, Annan und Kathrein, Ulreichs am Lehen saligen kinder, als wir des erweiset worden sein mit urchund, so er darumb gehabt von unserm gotshaus hat und eribrecht ist von unserm gotshaus, und das ze kauffen geben Hannsen Hubner Rugers sun von Pawmgarting, seiner hausfrawen Annan, Petreins tochter von Aw und iren baiden erben umb ein gelt, des sew gantzlich von in zalt sind ze rechten tagen an schaden, also haben wir ytzund benanten Hannsen Hubner, Annan seiner hausfrawen, und iren baiden erben das benant halb Nyderlehen verlihen kaufsgeweise und eingeantwurt in ir nutz und gewer mit allen eren, nutzzen und rechten, so von alter und durich recht darzu gehort und davon bekomen mag ze haws, ze hof, ze hofmarich, ze holtz, ze veld, ze wismad, ze waid versucht und unversucht, nichts ausgnomen, in der beschaiden, das sew uns und unserm gotshaus jarlichen und alle jar davon raichen und dynen sullent an unser frawen tag ze der dinstzeit sechtzigk newer Wienner phening, an prehentag fumftzehen Wienner phening ze pawstewr, an sand Jorgen tag fumf Wienner phening ze voitsteur und anderthalb huen. Auch wer herfur kumbt und peszer erib zu dem obgenanten halben lehen ist, darin der benant Kagerl, sein hausfraw und erben, der hat jarlichen und alle jar gantz recht ze widerkauffen, das oft genant halb lehen mit seiner zugehorung von dem benanten Hannsen Huebner, Ruger sun von Annan, seiner hausfrawen und von iren baiden erben umb vier und dreissig phunt guter Wienner phening in den nagsten viertzehen tagen vor unser frawen tag ze liechtmes oder darnach in den nagsten viertzehen tagen und an dhainem tag mer im jar. Ez ist auch der egenant Heinreich Kagerl mit seiner hausfrawen und allen iren baiden erben des benanten halben lehen mit aller zugehorung ze kauf als dann ytzund benant ist, des egemelten Hannsen Huebner, Rugers sun, Anna seiner hausfraw, Petreins tochter von Aw, und aller irer baider erben recht gewern und furstand fur all ansprach an aller stat, als oft in des mit recht, not und durft beschiecht nach dem lannds recht ob der Enns. Wir offen, sew sullent auch dhainerlay wandlung damit nicht haben, weder mit versetzzen noch mit verkauffen, noch in ander dhainerlay weise an unser hannt und guten willen, und sullent auch alles das davon leiden und dulden gein uns und unserm gotshaus, das ander unsers gotshaus eribler gein uns leident und duldent unvertzigen aller ander unsers gotshaus rechten in allen sachen. Des alles ze urchund geben wir den brief, versigelt mit unserm anhangundem insigel nach Christi geburde viertzehenhundert jar und darnach im sybentzehenten jar an phintztag vor sand Gregorgen tag in der vasten.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 26-28, Nr. 621