Ich Eberhart Volchra, mein hawsfraw, und all unser erben vergechen und tun kunt mit dem offen prief var allen, den er furchumbt, di in sechent, horend oder lesent, das wir mit wolbedachtem muet und gutem willenn zu der zeit, da wir das mit recht wolgetun machten, recht und redleich verchaufft und kewffleich ze chauffenn geben haben dem peschaiden mann Hansen dem Kursner ze Frawnsdarff, seiner hawsfrawen, und ir paider erben unser guet ze Wintpuhl mit sambt der mul, das gelegen ist in Olerstarffer pharr, und ist recht lechen von der herschafft ze Puchaim. Dasselbig guet mit mul mit al und aller zugehorung als durch recht dar zu gehort oder davon pechomen mag, haben wir in lawterlich und genczleich aufgeben und eingeanntwurt aws unser nucz und gewer in ir nucz und gewer mit allen den eren, rechten, zinsen, dinsten, nuczen und davon pechomen mugen ze holcz, ze veld, ze waid, ze wasser, ze wismad, gepaun und ungepaun, gestifft und ungestifft, versucht und unversucht, nichts davon ausgenomen angever umb ain gelt, des wir ze rechten tagen an allen schaden von in gancz und gar gericht und peczalt sein warden, also peschaidenleich, das wir nach all unser erben hincz dem selbn gut und mul mit aller zugehorung nw hinfuer dargegen nymmer chain zuspruch noch ansprach schullenn haben noch gewinnen, weder mit recht noch an recht und tun uns auch derselben zuspruch und ansprach und des egemelten guts mit sambt der mul aller sach lawterleich und genczleich ze rechter furczicht wissentleich mit krafft des gegenwurtigen priefs angever, also das si wol allen iren frum damit geschaffen mugen und schullen mit verseczen, mit verchauffen, geben, machen, schaffen, tun, wem si wellent oder wie sew verlust an alle unser und unser erben irrung, infallung und hindernus. Wir sein auch des obgenantten guts mit sambt der vorgeschriben mul und aller zugehorung ir rechter gewer und furstant fur all chrieg und ansprach, wo oder wann in des not und durfft geschiecht nach dem landes recht also chawffs und der herschafft ze Puchaim recht ist in dem land ob der Enns. Ging in aber daran von uns icht ab mit sambt der gewerschafft, was si des mit recht indert chainen schaden nement, wie der genanntt wurd, denselben schaden zusambt dem hawbtgut schullen wellen wir in aller sach gancz und gar ablegen, ausrichten und widerkeren an alle missehelung und wider red, und schullen sie das alles haben dacz uns und unsern trewnn, und darczu unverschaidenleich auf aller unserr hab und gut, wa wir die indert haben oder lassenn innerlandes oder ausserlandes, auf wasser oder auf land, besucht und unbesucht, nichts ausgenomen, mugen sew und schullen desselben abgangs hawbtguts und schadens vollikleich davon pechomen, so sew nachst und pest mugen, das ist unser und unser paider erben gutleich will, wart und gunst, wir sein lebentig oder tod. Das der chawff hinfur stet und unverkert peleib, daruber gib ich obgenanntter Eberhart der Volchra, mein hawsfraw, und all unser erben lebentig oder chunfftig, dem egenanten Hansen Chursner ze Frawnsdarff, seiner hawsfrawn und ir paider erben den offen prief zw ainer sichtigen urchund der warhait, pesigelten mit meines obgenanntten Eberhartten des Volchra aigen anhangunden insigel, und zw peisser sicherhait und zeugnus haben wir vleizzikleich gepeten den erbern weisen Ulreich den Prukner, di zeit phleger zw Puchaim, das der sein insigel an den prief gehangen hat, im und all sein erben an schaden und der herschafft rechten zu Puchaim unvergriffenleich. Der prief ist geben, da man zalt von Kristus gepurd vierczechenhundert jar darnach in dem sibenttczechunden jar an des heiligen hern sand Peter tag der ketenfeyer.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 34-36, Nr. 627