Wir Johanns von Gots genaden abbt zu Lambach bekenn mit dem offen brief allen, den er furchumbt, daz fur uns komen ist Katrey Hubnerin von Otrung und hat mit wolbedachten mut und guten willen ir nagsten freundt recht und redleich gemacht und geben irem eleichen mann Ulreichen Hubner ain gut ze Otnung gelegen in Otnunger pfarr, und ist rechts eribrechts von uns und unserm gotzhaws. Also haben wir auch dem egenanten Ulreichen und sein eriben das obgenant gut mit aller seiner zugehorung bestett und verlichen mit allen den eren, rechten und nutzen, die von allter und durich recht darzu gehorent und davon bekomen mugen, besucht und unbesucht, nichtz darinn ausgenomen in der beschaiden, daz sy uns und unserm gotzhaws alle jar jarleichen davon dyenen und raichen sullen ze unser frawn tag ze der dinst czeitt dreyssig guter Wienner phening. Es ist auch die egenant fraw Katrey des egenanten guts rechten gewer und furstandt fur all rechtleich anspruch alz offt daz dem egenanten Ulreichen des mit recht nott und durfft geschiecht, alz dann gemachtz und lannds recht ist in dem lanndt ob des Enns. Wir offen auch, daz sy chain wandlung mit dem obgenanten gut nicht haben sullen in dhainerlay weis an unser hanndt und guten willen und sullen auch alles davon leiden und dulden gen uns und unserm gotzhaus, das ander unsers gotzhaus erbler gen uns leident und duldent unverczigen unsers gotzhaws rechten in allen sachen. Des ze urkund geben wir in den brief, versigelten mit unserm anhangunden insigel, der geben ist nach Christi geburd vierczehenhundert jar, darnach in dem suben und czwainczigisten jar an sand Kilianstag.