Wir Johanns von Gotes genaden abbt zu Lambach bekennen und tun chund offenbar mit dem offen brief allen den er furkumbt, das fur uns chomen ist Ortolf Aichinger von Obernpawhenlach, Katrey sein hausfraw und habent mit wolbedachtem muet und guten willen all irer nachsten frewndt recht und redleich ubergeben irem liebem sun Gorgen und Anna, seyner hausfrawn, Ulreichs des Mosmulner tochter, ain viertail aws dem guet ze Obernpawhenlach, da die behawsung yecz auf stet. Also hat der benant Gorg auf dem egenanten guet gemacht seyner eleichen hausfrawn Anna fumfczehen pfunt Wyenner pfenning ze rechter morgengab und acht pfunt ze haymstewer und ubertewrung nach lannds recht. Also haben wir in auch das ob genant guet bestat und verlihen mit allen den eren, rechten [und nu]tzen, dy von alter und durch recht darzu [gehorent und] davon bechomen mugen, besucht und unbesuecht, nichtes ausgenomen ungeverleich in der beschaiden, das sy uns un[d unserm] goczhaws da von dyenen und raichen sullen nach innhaltung unsers urbarpuechs. Es ist auch der obgenant Ortolf des egenanten guecz rechter gewer und furstandt fur all rechtleich ansprach, als oft das dem egenanten Gorgen seynem sun, Anna seyner hausfnawn oder iren erben des mit recht, not und durft geschiecht, als dann morgengab, haymstewr und ubertewrung recht ist in dem lanndt ob der Ens. Wir offen auch, das sew dheynerlay wanndlung mit dem obgenanten viertail nicht haben sullen in dheynerlay weis an unser hanndt und gueten willen, und sullen auch alles davon leyden und dulden, das ander unsers goczhaws erblar gein uns und unserm goczhaws leident und duldent und unverczigen unsers goczhaws rechten in allen sachen. Mit urchund des briefs versigelten mit unserm anhanngundem insigel, der geben ist nach Christi geburde vierczehenhundert jar und darnach in dem siben und czwaynczikisten jare des suntags nach sand Margreten tag der heyligen junchkfrawn und martrarinn.