Wir Johanns von Gotes gnaden abbt ze Lambach bekennen mit dem offen brief allen, den er furkumbt, daz fur uns komen ist fraw Katherina, Michels des Oberhaymer seligen witib, und hat uns underweist mit urkund, so sy gehabt hat von unserm vorsedel abbt Jacobem seliger gedachtnuzz von des hoffs wegen, gelegen ze Mekchenpach in Weibarer pharr, wie derselb hoff von uns und unserm gotzhaus ir rechtz lehen sey. Also haben wir auch der egenanten frawn Katrey und allen ir eriben den benanten hoff mit aller zugehorung zu aim rechten lehen bestett mit alle den rechten, als dann von allter herkomen ist und als wir ir dann durich recht daran leichen sullen und mugen und unverczigen unsers gotzhaus lehenschafft in allen sachen. Und des ze urkund gebem wir ir den brief besigelten mit unserm anhangunden insigel, der geben ist nach Christi geburd vierczehenhundert jar, darnach in dem newnundczwaintzgisten jar am montag nach dem palmtag in der vasten.