Wir Johanns von Gotes gnaden abbt ze Lambach bekenn mit dem offen brief allen, den er furkumbt, das fur uns komen ist, Niklaz Dewtschel und hat uns underweist mit urkund, so er gehabt hat von unserm vorsedel abbt Erasem seliger gedachtnuzz von des halben guet, gelegen ze Nideretzling in unserm purkchfrid am Stadel, wie dasselb halb gut sein rechtz vetterleichs erib sey. Also haben wir auch dem obgenanten Niklasen, Osanna seiner hausfrawn, und allen iren baider eriben daz benant halb gut mit aller seiner zugehorung ze aim rechten eribrecht bestett und verlichen mit allen den eren, rechten und nutzen, die von allter und durich recht darzu gehorent und davon bekomen mugen, besucht und unbesucht, nichtz darinn ausgenomen, treuleich angeverd in der beschaiden, daz sy uns und unserm gotzhaus alle jar jarleichen davon dienn und raichen schullen nach sag und inhalltung unsers gotzhaus urbarpuechs. Wir offenn auch, daz sy chain wandlung mit dem benanten guet nicht haben sullen in chainerlay weis an unser hanndt und gueten willen und sullen auch alles daz davon leiden und dulden gein uns und unserm gotzhaws, daz ander unsers gotzhaus lewtt gesessen in purkchfrid am Stadel gein uns leident und duldent und unverczigen unsers gotzhaus purkchrechtz rechten in allen sachen. Des ze urkuend geben wir in den brief besigelten mit unserm anhangunden insigel, der geben ist nach Christi geburd vierczehenhundert jar, dar nach in dem newn und czwaintzgisten jar an sandt Dorothee tag der heylgen junkchfrawn.