Wir Johanns von Gotes gnaden abbt ze Lambach bekenn mit dem offen brief allen, den er furkumbt, daz fur uns komen ist Michel an der Wis, und hat uns underweist mit urkuend, so er gehabt hat von unserm vorsedel abbt Ulreichen seliger gedachtnuzz, wie er ain viertail hab an dem gut, genant daz Chrantzellehen, gelegen in Penewanger pharr, daz sein rechtz erib sey, und hat darnach daz ander viertail aus demselben gut keufleich in sein gwalt bracht von Micheln und Thaman, gebrudern, Hannsen am Perig seligen sun umb ain summ gelltz, der sy gantz und gar betzalt sein von im ze rechten tagen an schaden. Also haben wir auch dem obgenanten Micheln, Katrein seiner hausfrawn und allen iren baiden eriben die benanten zway viertail mit aller ir zuegehorung zu aim rechten eribrecht bestett und verlichen mit allen den eren, rechten und nutzen, die von allter und durich recht darzu gehorent und davon bekomen mugen, besucht und unbesucht, nichtz darinn ausgenomen, treuleich angever in der beschaiden, daz sy uns und unserm gotzhaus alle jar jarleichen davon dienn und raichen sullen an unser frawn tag zu der dienst czeitt dreyssik newr Wienner phennig und anderhalb huener, an sand Gorgen tag funf phennig ze vogtsteuer. Es sind auch die benanten brueder und all ir eriben des obgenanten viertail recht gewer und furstandt fur all rechtleich ansprach, als offt daz dem benanten Michell, seiner hausfrawn oder iren baider eriben des mit recht, nott und durfft geschiecht, als dann kauffs und lannds recht ist im lanndt ob der Enns. Wir offen auch, daz sy chain wandlung mit dem benanten gut nicht haben sullen in dhainerlay weis an unser hanndt und guten willen, und sullen auch alles davon leiden und dulden gein uns und unserm gotzhaus, daz ander unsers gotzhaus erbler gein uns leident und duldent unverczigen unsers gotzhaus rechten in allen sachenn. Mit urkund gebem wir in den brief besigelten mit unserm anhangunden insigel, geben nach Christi geburd vierczehenhundert jar darnach in dem newnundczwaintzgisten jar am sambstag vor Invocavit in der vasten.