Wir Johanns von Gotes gnaden abbt ze Lambach bekennen mit dem offen brief allen den er furkumbt, daz fur uns komen ist Hanns Mayr von Utntal und hat mit wolbedachtem muet und guten willen aller seiner nagsten freundt recht und redleich gemacht und geben seiner eleichen hausfrawn Barbara vierczehen phuntt phennig ze rechter marigen[g]ab auf sein gut in der Lankchwis gelegen in Puechkircher pharr. Also haben wir auch der obgenanten frawn Barbara daz obgenant gut mit aller seiner zugehorung bestett und verlichen in satz gweis mit alle den eren, rechten und nutzen, die von altter und durich recht darzu gehorent und davon bekomen mugen, besucht und unbesucht, nichtz darinn ausgenomen, treuleich angever in der beschaiden, daz sy uns und unserm gotzhaus alle jar jarleichen davon dienn und raichen sullen nach inhaltung unsers gotshaus urbarpuechs. Es ist auch der obgenant Hans seiner benanten hausfrawn rechter gewer und furstandt fur all rechtleich ansprach, als offt ir des mit recht, nott und durfft geschiecht als dann marigengab und lands recht ist im landt ob der Enns. Wir offen auch, daz sy chain wandlung damit nicht haben schol in dhainerlay weis an unser handt und guten willen und schol auch alles davon leiden und dulden gein uns und unserm gotzhaus, daz ander unsers gotzhaus erbler gein uns leident und duldent unverczigen unsers gotzhaus rechten in allen sachen. Mit urkund geben wir ir den brief besigelten mit unserm anhangunden insigel, der geben ist nach Christi geburd vierczehen hundest jar darnach in dem newn und czwaintzgisten jar an freytag nach gotzleichnamstag.