Wir Johanns von Gotes genaden abbt ze Lambach bechennen mit dem brief, das fur uns kommen ist Peter Tenkk mit aynem brief, der da lawtt im, seiner hausfraun Barbara und iren bayden eriben ain eribrecht, das im Wolfgang Pawswek zu chauffen gegeben hat auf dem hof zu Schretental mit seiner zuegehorung, gelegen in unnser pharr, und denselben hof wir nachmalen in unser gewalt haben bracht von unnserm lieben brueder Jacoben dem Dachsperger. Also haben wir den benanten Petern dem Tenkken, seiner hausfraun Barbaran und iren bayden eriben das egenant eribrecht auf dem egemelten hof mit alles seiner zuegehorung, darinn nichts ausgenomen angever, verlihen und bestett zu rechttem eribrecht, doch in solicher ausweisung, das sy uns und unnserm gotzhaus alle jar davon dienen schullen ze unser frawntag ze der dienstzeit zehen schilling phening, zu dem brehentag sechs schilling phening ze pausteur und zway vaschanghuen. Wir offen auch, das sy den egemelten hof stifftleichen und pewleichen innehaben und kaynerlay wandlung damit haben schullen in chayner weys an unnser handt und gueten willen, und schullen auch alles daz davon leiden und dulden, das ander unsers gotshaus erbler gein uns leyden und duldent, unverczigen unsers gotshauss rechten in allen sachen. Auch haben wir uns und unserm gotshaus besunnderleichen ausgeczogen und her dan gesunndert das holtz zenagstt gegen Klaws werts mit seiner zuegehorung, also das ausgeczaigtt und mit dem graben umbvangen ist. Des alles ze ainer waren urkund geben wir in den brief, besigelten mit unserm anhangunden innsigel, der gegeben ist nach Christ gebuerde vierczehenhunndert jar und dar nach in dem vierunddreyssigisten jare an sunttag vor sand Kathreyn tage.