Wir Johanns von Gotes genaden abbt ze Lambach bechennen an dem brief, das wir wolbedechtig mit verayntem rat und mit unnser handt und gantzer stet rechtt und redleichen verlihen haben zu aynem rechtten eribrechtt ain wis und ain ort zenagst dapey hinaws untz an den weg mit iren zuegehorung, also die ausgezaigtt mit marich und zawn umbvangen sind, gelegen in unnser Aw genantt auf der Weng in Wellser pharr her oberthalben Waydhawsen pey der Trawn her des halben auf dem landt, da Wellss aufflewt, und in unnserm ambt zee Strass, und verleychen auch die wissenleichen in chrafft des briefs Hainreich dem Wintter, seiner hawsfrawn Ursula und iren baiden eriben, die sy yeczund miteinander haben oder nach chunfttigkleichen gewingen, doch in solicher ausweisung, das sy uns und unserm gotshaus alle jar jerleichen davon dienn und raichen sullen ze unnser frawntag der dienstzeit drey schilling und funfundzwainczikg Wienner phenning. Wir melden auch, das sy chainarlay wandlung damit haben schullen in chainerlay weis an unser handt und gueten willen, und sy schullen auch alles das davon leiden und dullden, das annder unsers gotshauss eribler gein uns leydent und dulden und unverczigen unsers gotshaus rechten in allen sachen. Des ze urkund geben wir in den brief, besigelten mit unnserm anhangunden innsigel, der gegeben ist nach Christ gebuerd vierczehenhundert und in dem vierunddreissigisten jar an sand Barbarantag.