Jordanus miseratione divina episcopus Sabinensis, religioso viro .. abbati monasterii Lambacensis ordinis sancti Benedicti Pataviensis diocesis, salutem in Domino. Porrectis nobis ex parte Johannis [...]ger, laici dicte diocesis, supplicationibus, quantum cum Deo possumus, benignius annuentes auctoritate domini pape, cuius penitentiarie curam gerimus, discretioni tue commictimus, quatenus ipsius laici, qui, sicut accepimus, homicidiis laicalibus, spoliis et rapinis et incendiis extra loca sacra commissis interfuit et ad ea auxilium, consilium prestitit et favorem ipsaque seu eorum aliqua manu propria perpetravit, confessione diligenter audita ipsum laicum ab huiusmodi homicidiorum, spoliorum, rapinarum et incendiorum reatibus ac peccatis suis aliis, nisi talia fuerint, propter que merito sit sedes apostolica consulenda, absolvas hac vice et iniungas inde sibi auctoritate predicta pro modo culpe penitentiam salutarem, restituens eidem introitum ecclesie vice nostra. Proviso, ut si quibus ob premissa spolia, rapinas et incendia ad satisfactionem tenetur, satisfaciat competenter. Dat. Florentie, iiii nonas martii, pontificatus domini Eugenii pape iiii anno quarto.