Dem erwirding gewstlichen meinem genadigen herren abt Johannsen ze Lambach enbewt ich Angnes, des Allexen saling witib purgerin zu Lincz, meinen dinst. Lieber herre, ich hab czway chind, Wartholome und Jacob die sind noch nicht vogtper, die habent ain virtail an dem Nydernhoff zu Geyselmolczhaym in Puchler pharr, das haben wir dem Mair darauft zu chauffen geben und gib ewch das auf mit dem offen brieff an stat meiner chinder, und pitt ewr wirdichait fur mich und meinew chinder umb ewr insigel, das ir yem des ain brief fur uns gebt. Zu urchunt mit des erbern Wolfkangen des Chuerczen purger zu Wels, aufgedrukchten sigel, yem und sein eriben an schaden, den ich auch fur mich und meine chind[er] mit vleizz dar umb gepeten hab, und darunder wir uns verpinten mit unsern trewn stat zu haben und geschriben stet an dem brieff. Geben am mantag nach Reminiscere in der vasten anno xxxvto.