Julianus, miseratione divina titulo sancte Sabine sancte Romane ecclesie presbyter cardinalis, vulgariter sancti Angeli nuncupatus, in Germania apostolice sedis legatus, venerabili abbati monasterii sancti Kyliani Lambacensis ordinis sancti Benedicti Pataviensis diocesis, salutem in Domino. Benigno sunt illa vobis concedenda favore, per que, sicuti pie desiderare videmini conscientie pacem et salutem anime Deo propitio consequi mereamini, hinc est, quod nos vestris devotis supplicationibus inclinati vobis auctoritate legationis nostre, qua fungimur, tenore presentium indulgemus, ut aliquem ydoneum et discretum presbyterum in vestrum possitis eligere confessorem, qui vestra confessione diligenter audita, pro commissis et a quibuscunque excommunicationum, suspensionum aut interdicti sententiis per constitutiones provinciales et sinodales ac statuta et ordinationes monasterii et ordinis predictorum seu alias a iure generaliter promulgatis ac penis et censuris aliis, quibus legatus de latere absolvere potest, vobis debitam absolutionem impendat et iniungat penitentiam salutarem, insuper prefato confessori, quem duxeritis eligendum, auctoritate apostolica nobis in hac parte specialiter concessa committimus, ut si quam irregularitatis maculam premissis sententiis vel penis seu aliqua premissarum sic ligatur aut alias coram excommunicatis vel in locis interdictis ignoranter, non tamen in contemptum clavium divina celebrando officia et alias inmiscendo vos eisdem contraxistis vel incurristis, vobisque ad tempus, prout dicto confessori expedire videbitur, a vestrorum ordinum executione suspenso, demum suffragantibus vobis meritis ac alio non obstante canonico vobiscum in domino misericorditer eadem auctoritate hac vice dispenset, proviso, ut si quibus propter premissa ad satisfactionem aliquam teneamini, satisfatiatis competenter. Ceterum discretioni vestre committimus, quatenus auditis diligenter per vos vel alium sacerdotem ydoneum, quem ad hoc deputaveritis, confessionibus singulorum monachorum et conversorum vestri monasterii ipsos a sententiis, penis et censuris predictis, si quas incurrerunt, absolvatis et cum presbyteris et aliis in sacris ordinibus constitutis super irregularitate, si quam modo et forma premissis contraxerint, iuxta tenorem suprascriptum dispensetis misericorditer cum eisdem. Datum Basilee die decima Novembris anno domini millesimo quadringentesimotricesimoquinto, pontificatus sanctissime in Christo patris et domni nostri domni Eugenii divina providentia pape quarti anno quinto.