Wir Johanns von Gotes genaden abbt ze Lambach bechennen mit dem brief, das fur uns kommen sind Hainreich Snayttel, Kathrey und Ellspet geswesstern, Hannsen des Porechtleins seligen tachtter und habent miteinander veraintleichen und mit woldbedachtem und guetem willen irer eriben, mit unser handt und aller stet rechtt und redleichen verchauft ain guet ze Strass in unserm purkchfrid gelegen in Gunschyricher pharr, da weylent der benant Podechtlein auffgessessen ist, Sygharten dem Nidermair, Barbara seiner hawsfrawn und iren bayden eriben umb ain gelt, des sy gants beczalt sind. Also haben wir dem gemelten Syghart, seiner hawsfrawn Barbara und iren bayden eriben das egemelt guet mit aller seiner zuegehorung darinn nichts ausgenommen angever verlihen und bestett zu rechttem purckchrecht in der beschaiden, das sy uns und unserm gotzhaus alle jar davon dienn sullen an unser frawntag ze der dienstzeit zwenundzwainczigkch Wienner phening, an dem Brehentag achtt Wienner phening und an sand Jorgentag achtt phening. Es sind auch die egemelten Hainreich, Kathrey und Ellspecht und ir aller eriben des gemelten guetts des benanten Syghart, seiner hawsfraun und irer baider eriben ir rechtt gewern und furstand fur all rechtleich ansprach, als oft in des mit recht, not und durft geschiecht, als dann chauffs, purkchrechts und gwerschaft in dem landt ob der Ens recht ist. Wir melden auch, das sy chainerlay wandlung damit haben in chainer weis an unser handt und gueten willen, und schullen auch alles das davon leyden und dulden, das ander unsers gotzhauss lewt gesessen in unserm purkchfrid ze Strass gein uns leydent und dulden. Des ze urchund geben wir in den brief, besigelten mit unserm anhangunden insigel, der gegeben ist nach Christt gebuerde vierczehenhundert jar und darnach in dem fumfunddreyssigisten an mantag vor sand Wolfgangetag des heyligen.