Ich Wolfkang der Granperiger, Frydreichs Granperiger saligen sun, vergich fur mich und fur meinen prueder Gorigen und fur alle meine geswistred und fur all mein eriben und miteriben, die ich hab oder gewinne, mit dem brief allen den und er furchumbt umb die zwspruch, so ich und anstat meiner gewistret mit dem recht gehabt hab hincz Chunraten dem Mair zu Helkching, seiner hausfrawn Annen und iren eriben von eribschaft wegen der hueb mit irer zwgehorung gelegen zu Helkching in Penybekcher pharr, die si chaufft habent von meiner muemen Laneten der Erdingerin, Ruegers Granperiger saligen tochter, derselben meiner zwspruch wir zu paider seitt hinder frum leut gangen sein, die mir von dem benanten Chunraten dem Mair ain sum gelcz fur all mein eribschaft und meiner geswistret und eriben der obgenanten hueb gesprochen habent, des ich von yem gancz und gar beczalt und ausgericht pin zu rechter czeit und an allen schaden, darumb ich mich, meine geswistret, eriben und miteriben aller eribschafftt der obgenant hueb mit aller irer zwgehorung ab und furczicht getan haben und tun auch wissentlich mit krafft des brieffs, das wir noch unser eriben noch ander nyemant nicht von unsern wegen furbas darnach noch dagegen nymmer mer zu sprechen sullen noch wellen, haben noch gewinnen weder mit recht noch an recht. Es sol der benant Chunrat Mair, sein hausfraw Anna, und all ir eriben allen iren frum damit schaffen mit verseczen, verchauffen, geben an menekleiche irrung, wem si wellent. Des alles zu ainer warn und statten urchunt gib ich obgenanter Wolfkang in den brief mit meinem anhangunden insigel und zu ainer zewgnuzz mit des erbern Wolfkangen des Chuerczen, purger zu Wels, anhangundem insigel, yem und sein eriben an schaden, den ich mit vleizz darumb gebeten hab. Der brieff ist geben am phincztag nach sand Lucastag nach Christi gepurdt virczehenhundert und in dem funffunddreissigisten jare.