Wir Thaman von Gottes genaden abbt ze Lambach, bekennen mit dem brief, das fur uns an ainem aufgabbrief komen ist Hanns Hueber, burger ze Wels, und hat mit wolbedachtem muet und guetem willen aller seiner eriben und miteriben anstat sein und seiner hawsfrawn Margrethen, weylant Lienharts des Kaser zu Wels seligen tachtter und annder irr miterben, recht und redleichen verkaufft ain gut zu Mitternlab, genant das Koberlechen, mit seiner zugehorung, gelegen in Puchkircher pfarr und ist eribrecht von uns und unserm gotshaws, Thamann dem Smid zu Puchkirchen, seiner hawsfrawn Anna und iren baiden erben umb ain sum gelts, der sew gantz und gar ausgerichtt und beczalt warden sind zu rechtten tagen an schaden. Also haben wir in den yetzgemeltten dem Smid, seiner hawsfrawn und iren baiden eriben das vorgemeltt guet mit aller seiner zuegehorung, so von altter und durch recht darzue gehort oder davon bekomen mag, darinn nichtz ausgenomen noch hindangesatzt angever, verlichen und bestatt zu rechttem kauf und eribrecht in der beschaiden, daz sy uns und unserm gotshaws all jar jarleichen davon dienn und raichen sullen nach innhaltung unsers urrbar. Es sind auch der benant Huebar, sein hawsfraw und irer baider eriben und miteriben ir rechtt gwern und furstant fur all rechtleiche ansproch, als offt sein dann dem benanten Smid, sein hawsfrawn und iren eriben mit recht, not und durfft beschiecht, als dann soleichs kauffs, eribrechtz und lanndes ob der Enns recht ist. Wir offen, das sy kainerlay wanndlung damit nicht haben sullen in kainerlay weys an unser hanndt und guten willen, und sullen uns auch alles das davon leyden und dulden, das annder unsers gotshawss eribler gein uns leydent und duldent unverczigen unsers rechten in allen sachen. Auch ist ze merkhen, ob ain elterr brief herfurkom, der sol wider den brief und gerechtikait kain kraft mer haben angever. Ze urkund geben wir in des also den offenn brief besigeltem mit unserm anhanngundem insigel, der gegeben ist als man zalt nach Kristi geburd in dem vierczechenhundertundsechsunddreyssigisten jaren an sambtztag nach sannd Margrethen der heiligen junkchfrawn und martrerin.