Wir Thaman von Gotes genaden abbt ze Lambach bekennen mit dem brief, das fur uns komen ist Hanns Griessler, burger ze Yschel, und hat uns zu erkennen gegeben, wie sein vater Meinhart Griessler seliger bey seinem wolmugen mit wolbedachtem mut und gutem willen recht und redleichen verkaufft hab ain pewnten mit aller zuegehorung, genant Abersee, gelegen in unserm purkchfrid am Stadel czwischen Micheln des Rumppelindasen und Ulleins des Hardekker pewnten, Jacoben dem Gruber im Pruel, seiner hawsfrawn Kathrein und allen sein eriben umb ain sum gelts, der er gantz und gar ausgericht und beczalt sey worden zu rechtten tagen an allen schaden. Also haben wir im dem yetz gemeltten Jacoben, seines hawsfrawn Kathrein und allen sein erben die gemeltten pewnten mit iren zugehorungen bestett und verlichen zu rechttem kauf und purkchrecht, was wir in rechtleichen daran bestetten und verleichen sullen oder mugen in der beschaiden, das man uns und unserm gotshaws all jar jarleichen davon raichen und dienn sol zu sannd Michelstag czwelif Wienner phenning. Es ist auch der obgemeltt Hanns Griessler und all sein eriben des gemeltten pewnten mit irr zuegehorung des benanten Jacoben, seiner hawsfrawn Kathrein und aller seiner eriben rechtt gwern und furstandt fur all rechtleichew ansprach, wo in des not und durft beschiecht mit dem rechten, als dann soleichs kaufs, purkchrechtz und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unser hanndt und gutem willen und sullen uns auch alles das davon leyden und dulden, das annder unsers gotshaws lewt gesessen in unserm purkchfrid am Stadel gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief besigeltem mit unserm anhanngunndem insigl. Geben als man zalt nach Kristi geburd in dem [viercz]ehenhundertundnewnunddreissigisten jaren an eritag nach Mathei apostoli et ewangelisste.