Wir Thaman von Gotes genaden abbt ze Lambach bekennen mit dem brief, das fur uns komen ist Elsbeth, Hannsen des Pesennger seligen witib, und hat uns furbracht und zu erkennen gegeben, auch underweist durich frume lewt, die dann zu zewgnuzz in dem brief geschriben stenndt, wie ir benanter man seliger sich bey seinem wolmugen verwilligtt hab des guts ze Pheffenperig, genant das Obergut, gelegen in Rusdorffer pharr mit aller seiner zugehorung, so von altter und durch recht darzu gehort, darinn nichts ausgenomen noch hindan gesatzt angever, abzetreten und uberzegeben, das eribrecht ist von uns und unserm gotshaws und des benanten Hannsen rechts vaterleichs erib, und der gemeltten Elsbethen rechts kauffs und erlosts guet mitsambt irm benanten mann seligen von seinem brueder Chunczlein dem Pesennger, des sy [u]ns underweist hat mit urkunden, ausganngen von unserm vorsedel abbt Symon seliger gedachtnuzz, des gleichs sich die obgemeltt Elsbeth [mitsa]mbt irm benanten mann seligen auch verwilligtt hab und verwilligtt sich des auch noch gantz und gar wissentleichen mit kraft des briefs, au[ch a]bzetreten und uberzegeben fur all annder irer baider eriben irem lieben aydem und irer lieben muemen Lienharten Smid, Hainczleins weylandt [ze] Rewthaym saligen sun, Anna seiner hawsfraw und irn baiden eriben durch irer dienst und trewn willen, die sew in lannge zeit getan und erczaigtt habent, und hat uns vleyzzig, das wir in den yetz gemeltten dem Lienharten, seiner benanten hawsfrawn, und iren baiden [eriben] das gemellt gut mit seiner zugehorung geruchten zu bestetten und verleichen, das wir also getan haben nach pet und underweysung, und tun auch das wissentleichen mit kraft des briefs, was wir in rechtleichen daran bestetten und verleichen sullen oder mugen in der beschaiden, das man uns und unserm gotshaws all jar jarleichen davon raichen und dienn sol zu sannd Michelstag funff Wienner phening und ain henn. Es sind auch die obgemelltten Hanns Pesennger und Elsbeth sein hawsfraw und irer baider eriben des gemeltten guts mit seiner zugehorung des benanten Lienharten, seiner hawsfrawn Anna und irer baider eriben rechtt gwern und furstandt fur all krieg, invall oder ansprach, wo und wann in des not und durfft beschiecht mit dem rechten, als dann soleichs abtretens, ubergebens, eribrechts und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weys an unser hanndt und gutem willen, und sullen uns auch alles das davon leyden und dulden, das annder unsers gotshawss eribler gein uns leydent und duldent unverczigen unsers gotshawss rechten in allen sachen. Zewgen der obgemelltten sachen und hanndlung, und das wir umb unser insigel gebeten worden sein Hanns Pekch, Hanns Ruebel, Kunrat Huebmer, Peter Pheyffer, all gesessen zu Phaffenperig und annder frumer lewt genug. Ze urkund geben wir in des also den offenn brief, besigeltem mit unserm anhanngundem insigel. Der brief ist geben als man zalt nach Kristi geburde in dem vierczechenhundertundnewnunddreissigisten jaren an phintztag nach Oswaldi regis.