Wir Thoman von Gotes genaden abbt ze Lambach bekennen mit dem brief, das uns an ainem besigeltem aufgabbrief aufgesanndt hat Margreth, Micheln des Czechentperiger, weylant burger im Newnmarkcht seligen witib. So sind fur uns komen Margreth an stat ir, irer swester Anna, dafur si sich wissentleichen angenomen hat, und Mertt Altag, und habent mit wolbedachtem mut und gutem willen redleichen verkaufft funf funffttail, das also bringt ain drittail aus ainem drittail in dem mittern drittail aus der hueb ze Adelpoting in Taufkircher pfarr gelegen, das da eribrecht ist von uns und unserm gotshaws, hat die obgemeltt Margreth, mitsambt ir ir benanter man, czwen funftail kawfleichen in ir gwaltsam bracht von Linharten dem Messrer, Kathrein seiner muemen. Dann der gemeltt Alltag hat auch ainen funfftail kawfleichen in sein gwaltsam bracht von Angnesen, gesessen zu Manswerd in Osterreich, Ulreichs des Messrer, weylant ze Adelpoting seligen tachtter. So sind dann czwen funftail auch Ulreich des Messrer seligen techtter Margrethen, Anna rechtz vaterleichs erib gewesen, des wir alles underweist worden sein mit urkunden und von frumen erbern lewten, und habent die gemeltten funf funftail, ain drittail aus dem mittern drittail aus der benanten hueb nun verkaufft und ze kauffen gegeben Niklasen dem Sigharter, burger im Newnmarkcht, seiner hawsfrawn Elzbethen und iren baiden erben umb ain [sum geltz, der wir ga]ntz und gar ausgerichtt und beczalt worden sind zu rechtten tagen an allen schaden. Also haben wir im dem gemeltten Nik[...] und irn baiden eriben funff funfttail, ain drittail aus dem mittern drittail aus der hub ze Adelpoting mit aller [...] und eribrecht, bestett und verlichen, was wir in rechtleichen daran bestatten und verleichen sullen oder mugen in der be[schaiden, das man uns und] unserm gotshaws all jar jarleich davon raichen und dienn sol nach innhaltung des rechtten eribbriefs, so uber das gemltt mitter drittail ist lawtt und sag. Es sind auch die obgemeltten Margreth die Zechentpergerin, auch Margreth, Anna geswistred, Ulreichs des Messrer seligen techtter, und Mertt Alltag und ir aller eriben funf funftail ain drittail aus dem gemeltten dritteil mit aller zugehorung yeder benant tail seins tails des benanten Niklasen Sigharter, seiner hawsfrawn Elzbethen und irer baider erben rechtt gwern und furstandt fur all krieg, invall oder ansprach, wo und wann in des not und durft beschiecht mit dem rechten, als dann soleichs kauffs, eribrechtz und lanndes ob der Enns recht ist. Wir melden auch, das sy kainerlay wanndlung damit nicht haben sullen in kainerlay weys an unser hanndt und gutem willen, und sullen uns auch alles das davon leyden und dulden, das annder unsers gotshawss eribler gein uns leydent und duldent unverczigen unsers gotshawss rechten in allen sachen. Ze urkund geben wir in des also den offen brief, besigeltem mit unserm anhanngundem insigil. Geben als man zalt nach Kristi geburd in dem vierczechenhundertundnewnunddreissigisten jaren an eritag nach sannd Peter und Pauls tag der heiligen czelifpoten.