Wir Thaman von Gotes genaden abbt ze Lambach bekennen mit dem brief, das fur uns komen ist Liendel, Hannsen des Stegleins weylandt in der Lederaw seligen sun, und hat mit wolbedachtem mut und gutem willen recht und redleichen verkaufft daz halb gut, genant daz Merergut in der Lederaw, gelegen in Varichdorffer pharr, mit aller seiner zuegehorung, so von altter und durch recht darzu gehort, darinn nichtz ausgenomen noch hindan gesatzt angever, das da eribrecht ist von uns und unserm gotshaws und kawfleichen in sein gwaltsam bracht hat von seiner lieben muter Elsbethen, und hat das nun ze kauffen gegeben Steffann dem Zeydelhuber, seiner hawsfraw Angnesen und irn baiden erben umb ain sum geltz, der er gantz und gar ausgerichtt, und beczalt worden ist zu rechtten tagen an allen schaden. Also haben wir im, dem yetz gemeltten Steffann, seiner hawsfrawn Angnesen und irn baiden eriben das gemeltt halb gut mit seiner zugehorungen bestett und verlichen zu rechttem kauf und eribrecht, was wir in rechtleichen daran bestetten und verleichen sullen oder mugen in der beschaiden, das man uns und unserm gotshaws all jar jarleichen davon raichen und dienn sol zu unser lieben frawntag der dienstzeit funfundczwainczigk Wienner phening, zu dem prehentag czwainczigk Wienner phening ze pawstewr, zu sannd Jorigentag funfczechen Wienner phening ze vogtstewr und drew vaschang huener. Es ist auch der obgemelltt Liendel und all sein eriben des gemeltten halben gutz mit seiner zugehorung des benanten Steff[an, seiner] hawsfrawn Angnesen und irer baider eriben recht gwern und furstandt fur all rechtleichew ansprach wo u[nd wann] es not und durft beschiecht mit dem rechten, als dann soleichs kaufs, eribrechtz und lanndes ob der Enns recht ist. Wir wellen auch, daz sy kainerlay wanndlung damit nicht haben sullen in kainerlay weys an unnser hanndt und gutem willen, und sullen uns auch alles das davon leyden und dulden, das annder unsers gotshawss eribler gein uns leydent und duldent unverczigen unsers gotshawss rechten in allen sachen. Ze urkund geben wir in des also den offen brief, besigeltem mit unserm anhanngundem insigl. Geben als man zalt nach Kristi geburd in dem vierczechenhundertundneununddreissigisten jaren an mitichen nach Thome apostoli.