Wir Thaman von Gotes genaden abbt ze Lambach bekennen mit dem brief, das fur uns komen ist Hainreich Verig am Hewfeld und hat mit wolbedachtem mut und gutem willen recht und redleichen gemachtt und gegeben seiner lieben hawsfrawn Barbara sechczechen phunt phenning munnss gib und geb im lanndt ob der Enns zu rechttem heyratgut nach dem lanndes recht ob der Enns auf seiner gerechtikait an dem haws, hofmarich und aller seiner zugehorung, gelegen am Hewfeld in Vischenhaymer pharr, das da eribrecht ist von uns und unserm gotshaws. Also haben wir ir, der benanten Barbara, des gemeltten irs mann gerechtikait an dem gemeltten haws, hofmarich mit aller zugehorung das gemeltt ir gemachtt darauf bestett und verlichen, was wir ir rechtleichen daran bestetten und verleichen sullen oder mugen in der beschaiden, das man uns und unserm gotshaws all jar jarleichen davon raichen und [dien] sol nach innhaltung unsers sunder des kaufbriefs, so uber das gemeltt haws, hofmarich und aller zugehorung ist [laut und sag]. Es ist auch der obgemellt Hainreich und all sein eriben des gemeltten haws, hofmarich mit aller zuegehorung sunder [des] benanten Hainreichs gerechtikait daran der benanten Barbara irs gemeltten gemachtz darauf ir recht gwern und furstanndt fur all krieg, invall oder ansprach, wo und wann ir des not und durft beschiecht mit dem rechten, als dann soleichs gemachts, heyratgutz, eribrechtz und lanndes ob der Enns recht ist. Wir offen auch, das sy kainerlay wanndlung damit nicht haben sol in kainerlay weis an unser hanndt und gutem willen und sol uns auch alles das davon leyden und dulden, das annder unsers gotshawss eribler gein uns leydent und duldent unverczigen unsers gotshaws rechten in allen sachen. Ze urkund geben wir ir des also den offenn brief, besigeltem mit unserm anhanngunndem insigil. Geben als man [zalt] nach Kristi geburde in dem vierczechenhundertundnewnunddreissigisten jaren an sambstag vor Symonis et Jude.