Ich Sigmund Schifer, diezeit verbeser der grafschaft des wolgeboren herrn hern Johannsen, graven ze Schawnberg, bekenn mit dem offenn brief, das ich in volligem gedenkchen bin und wissentleichen ist, das nyderhalben der stat ze Wels nahent ob Marichtrenkch nahent dabey ain holtz gestanden und gewesen ist, dasselb was gewesen, genant das Niderhard, und hat gehort gein Lambach, dasselb abgemaissen, verganngen und gedort ist. Das dem also sey, das sag ich bey meinen trewn. Ze urkund der sachen gib ich den brief besigeltem mit meinem anhanngundem insigl mir und mein eriben an schaden. Geben als man zalt nach Kristi geburde in dem vierczechenhundert und vierzigisten jaren an freytag nach Invocavit in der ersten vastwochen.