Ich Margrett, Thaman dez Zunten zw Stras saligen witib, enpewt dem erwirdigen geistlichen herrn dem abptt zw Lambach mein gehorssamen und willigen dinst. Ich lazz ewr genad wissen, daz ich und mein erben meim lieben aydem maister Hainrich mein gut, ain erib mit aller zuegehorung in Heresinger phar, daz ewren genaden und dem goczhaws zw Lambach dinspar ist, verchawfft und zw chaufen geben haben und pitt ewch diemuethig alz meinen herrn, dem wenant meinem aydem daz vorgenant gut mit seiner zuegehorung zw leichen und ein chauffprieff nach ewr goczhaws rechten darumb geben, daz ist mein und meiner erber gutleicher will an widersprechenn, und sent ewr genaden daz gut mit dem prief auff fur mich und all mein erben. Zw urchund sent ich ewren genaden den prief, wenn ich selber prechenhalben nicht mag, versigelt under dez edlen Wolfgang des Weisenpekchen auffgedrukchten insigel, im und sein erben an schadenn, darunder ich mich obgenante Margrett verpintt mit mein trewn fur mich und all mein erben. Daz daz war sey, so vor geschriben stet. Geben am sambcztag nach dem ebenweichtag im xl und cccc.