Wir Thoman von Gotes genaden abbtt ze Lambach bekennen mit dem brief, das fur uns komen ist Lienhart Wienner burger ze Wels, und hat mit wolbedachtem mut und gutem willen recht und redleichen verkaufft halben tail an halber wisen, genant die Furtwis, und halben tail an halber pewnten dabey bey dem Grunpach, alles gelegen in Welsser pharr, das also eribrecht ist von uns und unserm gotshaws, und kawfleich in sein gwaltsam bracht hat von Dorothea, yetz Steffann des Gaubinger, burger ze Wels eleichew hawsfraw, und weylandt Ulreichs von Holczarn seligen witib, Herman dem Durrhof, burger zu dem Behaymischen Budweys, seiner hawsfrawn Margrethen und irn baiden eriben umb ain sum geltz, der er gantz und gar ausgerichtt und beczalt worden ist zu rechtten tagen an allen schaden. Also haben wir im, dem yetz benanten Herman, seiner benanten hawsfrawn und irn baiden eriben halben tail an halber benanter wisen und pewnten mit aller zugehorung bestett und verlichen, was wir in rechtleichen daran bestetten und verleichen sulln oder mugen in der beschaiden, das man uns und unserm gotshaws all jar jarleichen davon raichen und dienn sol nach innhaltung der brief, so uber baider benant halber tail wisen und pewnten ist lawtt und sag. Es ist auch der obgemeltt Lienhart und all sein erben halbs tails an halber benanter wisen und halbs tails an halber benanter pewnten mit aller zugehorung des benanten Herman, seiner hawsfrawn Margrethen und irer baider eriben rechtt gwern und furstandt fur all rechtleichew ansprach, wo in des not und durft beschiecht mit dem rechten, als dann solhs kaufs, eribrechts und lanndes ob der Enns recht ist. Wir offen auch, das sy kainerlay wanndlung damit nicht habn sullen in kainerlay weis an unser hanndt und gutem willen, und sulln uns auch alles das davon leyden und dulden, das ander unsers gotshawss eribler gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Christi geburd in dem virczechenhundertundvirczigisten jaren an freytag nach Gothardi.