Ich Hanns Hachenczeller vergich fur mich, mein hawsfrawn Dorothea und fur all unser eriben und tun kund offennleichen mit dem brief aller menikleichen, den er furkumbt ze horn oder ze lesen, als mir der erwirdig geistleich, mein genadiger lieber herr abbt Thaman ze Lambach die aw zu vorstrecht und freyer stift verlassen hat, gelegen zwischen meins obgenanten Hannsen gut und zwischen Wernharten von Obernperig wisen in Vischenhaymer pharr, als die selben grundt dann yetz mit stainen vermaricht und umbfanngen sind, auch mit pawmen von ainem kersbawm in ainen velberpawm, davon ich oder wer die benant aw oder grundt nach mir innen hat mit willen und gunst ains yeden und abbt ze Lambach davon raichen und geben sulln zu vorstrecht dem erwirdigen gotshaus ze Lambach all jar jarleich des nagsten mitichen nach sannd Kolmanstag ainen metzen habern. Ich glob und versprich auch, ich obgemeltter Hanns fur mich, mein benante hawsfrawn und fur all unser eribn, das wir die benanten aw dem benanten unserm genadigen heren, seinem gotshaws und nachkomen nicht emphremden noch encziechen sulln noch enwelln noch nyemantz ander nyemants von unsern wegen weder zu unsern grunden noch andern enden in kainerlay sachen noch weys getrewleich und ungeverleich, sunder dem benanten erwirdigen herrn, seinem gotshaws und nachkomen damit trew, gehorsam und gewerttig sein und alles das gein in leyden und dulden, das annder ir vorstlewt gein in leydent und duldent, dieweil wir die benanten aw mit gutleichem irm willn innhaben. Ze urkund geben wir in des also den offenn brief, besigeltem mit des edeln und erbern Wolfganng des Mathawser und Thamann des Leroch baider aygen aufgedrukchtten insigeln, die daz baid tan habent durch meiner vleissigen gebet willen, in baiden und allen irn erben an schaden, under der benanten insigeln ich mich obgemeltter Hanns fur mich, mein benantew hawsfrawn und fur all unser eriben verpind mit mein trewn in aydesweys alles das war und stet ze halden und ze volfuren, daz an dem brief geschriben stet. Geben als man zalt nach Kristi geburd in dem vierczechenhundert und vierczigisten jaren an suntag sannd Philipp und sannd Jacobstag der heiligen zwelifpoten.