Wir Thoman von Gottes genaden abbt zu Lambach bekennen mit dem brief, das fur uns komen ist Jorig Fraidel, burger zu Wels, und hat mit wolbedachtem mut und gutem willn recht und redleichen verkaufft die pewnt, gelegen auf der Haid under dem Wagrain in Welser pharr niderhalb des Ardinger pewnt, die eribrecht, isrt von uns und unserm gotshaus, des wir underweist worden sein mit briefleicher urkund, ausganngen von unserm vorsedel abbt Johannsen saliger gedachtnuss, Bernharten dem Grunwald, seiner hausfrawn Kunigunden und allen sein erben umb ain sum gelts, der er gantz und gar ausgerichtt und beczalt worden ist zu rechtten tagen an allen schaden. Also haben wir in den yetz benanten, dem Bernharten, seiner hausfrawn und alln sein erben die benant pewnten mit aller zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns, unserm gotshaus all jar jarleichen davon raichen und dienn sol an unser lieben frawntag der dienstzeit vier Wienner phenning. Es ist auch der der obgemelt Jorig und all sein eriben der benanten pewnten mit irr zugehorung des gemeltten Bernharten, seiner hausfrawn und aller seiner eriben rechtt gwern und furstanndt fur all rechtleichew ansprach, wo in des not und durft beschiecht mit dem rechten, als dann solhs kaufs, erbrechts und lanndes ob der Enns recht ist. Wir offen auch, daz sy kainerlay wanndlung damit nicht haben sulln in kainerlay weis an unser hanndt und gutem willen, und sulln uns auch alles das davon leiden und dulden, daz annder unsers gotshawss eribler gein uns leident und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertund dreinundvierczigisten jaren an eritag nach Judica.