Wir Thoman von Gottes genaden abbt zu Lambach bekennen mit dem brief, das fur uns komen ist Anna, Ulreichen des Schalkch hausfraw und hat mit wolbedachtem mut und gutem willen recht und redleichen abtreten und ubergeben irm lieben aidem und tachtter Lienharten dem Tunkchel, seiner hausfrawn Elsbethen und irn baiden eriben, darumb ir der benant Tunkchel ain sum gelts hinaus gegeben hat, daran auch sein benantew swiger ain volligs gantz benugen hat, des guts ze Riczling mit aller seiner zugehorung, genant daz Smid gut in Aczpekcher pfarr gelegen und daz halbs gekaufft ist worden von Hannsen und Symon den Viechtrewtern, und eribrecht ist von uns und unserm gotshaus, des wir underweist worden sein mit briefleicher urkund, ausganngen von unserm vorsedel abbt Johannsen seliger gedachtnuss. Also haben wir im, dem benanten Lienharten, seiner benanten hausfrawn und irn baiden eriben das gemeltt gut mit seiner zugehorung zu ubergeben gut und eribrecht bestett und verlichen, waz wir in rechtleichen daran bestetten und verleichen sulln oder mugen, doch daz man uns und unserm gotshaus all jar jarleichen davon raichen und dienn sol nach innhaltung unsers gotshauss urbarpuch. Es ist auch die obgemellt Anna und all ir eriben des benanten gucz mit aller seiner zugehorung der gemeltten Lienharten, seiner berurten hausfrawn und irer baider eriben rechtt gwern und furstanndt fur all rechtleichew ansprach wo und wann in des not und durft beschiecht mit dem rechten, als dann soleichs abtretens, erbrechtz und lanndes ob der Enns recht ist. Wir offen auch, daz sy kainerlay wanndlung damit nicht haben sulln in kainerlay weys an unser hanndt und guten willen, und sulln uns auch alles daz davon leyden und dulden, daz annder unsers gotshawss eribler gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief besigeltem mit unserm anhanngundem insigel. Geben als man zalt nach Kristi geburde in dem vierczechenhundertunddreynundvierczigisten jaren an mantag vor des heyligen herren sannd Johanns gotstauffer tag ze sunibenndtten.