Wir Fridreich von Gotes gnaden Romischer kunig, zu alln czeiten merer des reichs, herczog zu Ostrich, ze Steir, ze Kernden und ze Krain, grave ze Tirol etc. embieten unserm getrewen Ulrichen dem Anhannger, unserm phleger zu Starhemberg, unser gnad und alles gut. Uns hat anpracht der ersam geistlich unser lieber andechtiger n. der abbt zu Lambach, wie du im und demselben seinem gotshaus ingriff in den markht und wildpan daselbs zu Lambach tust, das im vormals von anndern phlegern ze Starhemberg nie beschehen sey, emphelhen wir dir ernstlich und wellen, daz du dem vorgenanten abbt und seim gotshaus wider ir alts herkomen und freyhait damit sy begnadet sein furpazzer nicht ingrif noch irrung tust in dhain weg. Das ist unser ernstliche maynung. Geben zu der Newenstat an monntag nach des heiligen krewcz tag invencionis anno domini etc. xliii^o unsers reichs im vierden jare.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 729, Nr. 1094