Wir Thoman von Gotes genaden abbt ze Lambach bekennen mit dem brieve, das fur uns komen ist Jorig Schefman anstat sein und zwayer geswistreden Jeronimus, Margrethen, und hat uns unnderweist mit briefleicher urkund, vormallen auch von uns ausganngen, auch durch frum lewt, wie in nun nach abganng irs lieben eenn Thoman am Ordt, weilandt burger ze Wels seligen in erbschaft zugevallen sei und angestorben ist dy hueb genant an der Prantstat, gelegen in Talhaimer pharr, und lechen ist von uns und unnserm gotshaus, und bat uns darauf vleissig, das wir im und seinn benanten geswistreden die bemeltten hueben mit aller irer zugehorunngen geruchten zu bestetten und verleichen. Also haben wir in, den gemeltten dreyn geswistreden Jorigen, Jeronimus, Margrethen und allen iren erben dy bemeltten hueben mit aller irer zugehorung bestett und verlichen, was wir in rechtleichen daran bestetten und verleichen sullen oder mugen solher mainung, das sy die gemeltten hueben mit aller irer zugehorung stiftleich und pewleichen von uns und unnserm gotshaus und nachkomen in lechensweis innhaben, nutzen und niessen sulln und mugen, als dann solhs pewtellechens und des lanndes ob der Enns recht ist ungeverleichen, doch uns, unnserm gotshaus und nachkomen an unnser lechenschaft unschedleichen. Sy sullen uns auch von der obgenanten lechenschaft wegen getreuleich gehorsam und gwerttig sein mit stewr und in annderen wegen an alle widerred, als annder unnser lechenslewt dy pewttellechen von uns habent. Mit urkund des briefs, den wir in also darumb geben, besigelt mit unnserm anhanngundem insigel. Geben als man zalt nach Kristi geburde in dem vierczechenhunndertundfunffundsechczigisten jare an sambstag Petri et Pauli apostolorum.