Wir Thoman von Gotes genaden abbt ze Lambach bekennen mit dem brief, das fur uns komen ist Lienhart Kalbshaupp, burger zu Wels, und hat mit wolbedachtem mut und gutem willen recht und redleichen verkaufft zway tagwerch wismad ze Mostal in dem Mitterveld gelegen zwischen Ulreichen des Rennharten weilandt und Kathrein, Lienharten des Harder muter baider seligen wisen in Gunskircher pharr, und hat dy ze kauffen gegeben Hainreichen dem Snaittlein zu Stross, seiner hausfrawn Anna und allen sein erben umb ain sum geltz, der er gantz und gar ausgerichtt und beczalt ist zu rechtten tagen an allen schaden. Also haben wir im dem yetz gemeltten Hainreichen, seiner hausfraun und allen sein erben dy obenanten zway tagwerch wismad mit allen iren zugehorungen besteet und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon reichen und dienn sol zu unnser lieben frawntag der dienstzeit achtt Wienner phenning, dann ain gartel hat der obgenant Lienhart nicht verkaufft, das hat er im vorgehalten nach lautt des briefs, so er noch umb dy berurten zway tagwerch wismad hat, davon man dann dient zwen pfenning, auch zu dem benanten unnser frawntag. Es ist auch der obenant Lienhard und all sein erben der gemeltten zwayer tagwerch wismad mit aller zugehorung des berurten Hainreichen, seiner hausfrawn und aller seiner erben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann solhs kauffs und lanndes ob der Enns recht ist. Wir offen auch, das sy kainerlay wandlung damit nicht haben sulln in kainerlay weis an unnser handt und gutem willen, und sulln uns auch alles das davon leyden und dulden, das annder unnsers gotshauss erbler gein uns leydent und duldent unverzigen unnsers gotshauss rechten in allen sachen. Mit urkund des briefs, den wir in also darumben geben, besigelt mit unnserm anhangundem insigel. Geben als man zalt nach Kristi geburde in dem vierczechenhundert undfunffundsechczigisten jare an eritag nagst nach sannd Erasemtag des heiligen bischolve inn phingstveirtagen.