Wir Thoman von Gotes genaden abbt ze Lambach bekennen mit dem brief, das fur uns komen ist Kunrat Scholermair und hat mit wolbedachtem mut und gutem willen recht und redleichen verkaufft dy wisen, genant dy Radwisen bei den Mullraden der Obernmul, gelegen in Kirichperger pharr, und gehort in den Scholerhof, der erbrecht ist von uns und unnserm gotshaus, und hat dye ze kauffen gegeben Wolfganngen ze Aitterperg, seiner hausfrawn Angnesen und iren baiden erben umb ain sum geltz, der er ganntz und gar ausgerichtt und beczalt erberleichen worden ist zu rechtten tagen an allen schaden. Also haben wir in den yetz benanten dem Wolfganng, seiner benanten hausfrawn und iren baiden erben dy bemeltten wisen mit aller irer zugehorung, auch mit wegen und stegen, so von altter und durch recht darzu gehort, bestett und verlichen, was wir in rechtleichen daran bestetten und verleichen sulln oder mugen, doch das man uns und unnserm gotshaus all jar jarleichen davon raichen und dienn soll zu unnser lieben frawntag der dienstzeit zechen Wienner phenning. Es ist auch der obgemelt Kunrat Scholermair und all sein erben der obenanten wisen mit aller zugehorung des berurten Wolfganng, seiner hausfrawn Angnesen und irer baider erben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann solhs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und guetem willen, und sullen uns auch alles das davon leyden und dulden, das annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Mit urkund des briefs, den wir in also darumb geben, besigelt mit unnserm anhangundem insigel. Geben als man zalt nach Kristi geburde in dem vierczechenhunndertundfunffundsechczigistem jare an mantag nagst nach sannd Urbanstag des heiligen babst.