Wir Johanns von Gots genaden abbt zw Lambach bekennen mit dem prief, das fur unns komen ist Jorig zw Kawfing und hat mit wolbedachtem muet und guetem willen recht und redlichen vermacht und geben seiner elichen liebm hawsfrawn Anna sechs pfundt pfening lanndeswerung im lanndt ob der Enns, und vermacht ir die zw freyer marigengab auff aller seiner eribschafft und gerechttigkaytt, so er hat an dem halben guet zw Pfaffenperig in Russtorffer pfarr gelegen und ist eribrecht von unns und unnserm gotshaws. Allso haben wir ir der yetz genantn Anna die vorgenantn sechs pfundt pfening in marigengab awff der vorgenantn eribschafft und gerechttigkayt an dem obbenantn halben guet bestatt und verlichen, was wir ir rechtlichen daran bestatten und verleichen sullen oder mugen, doch das man unns und unnserm gotshaws alle jar jarlichen davon rayen und dien soll nach innhalt, lawtt und sag unnsers gotshawss urbarpuechks. Ist auch der obbenant Jorig fur sich und all sein eribm des vorgenantn gemachts und maringgab der vorbenantn Anna seiner hawsfrawn rechter gewer und furstanndt fur allew rechtlichew ansprach, wo und wann in des nott und durfft beschiecht mit dem rechtn, alls dann solhs gemachts, maringab und lanndes ob der Enns recht ist. Wer auch nachster erib ist nach des benantn Joring tod und abganng, der hat all jar jarlichen zw unnser lieben frawn der liechtmess viertzehen tag vor oder viertzehen tag hinnach losung von der egenantn Anna oder iren eribm umb die vorbenantn sechs pfundt pfening und nicht umb mer. Gyenng sy aber vor sein an leyberibm mit tod ab, da Got auch lanng vor sey, so ist im und seinn eribm die sechs pfundt pfening ir gemacht und marigengab hinwider gefallen, und mugen dann damit hanndln und tuen, wie sew verlusst ungeverlich. Wir offen auch, das sew kainerlay wanndlung damit nicht haben sullen in kainerlay weys an unnser hanndt und gueten willen, und sullen unns auch alles das davon leyden und dulden, das ander unnsers gotshawss eribler und hindersassen gein unns leydent und duldent unvertzigen unnsers gotshawss rechtn in allen sachen. Zw urkund geben wir ir des allso den offen prieff, besigelt mit unnserm anhanngundn insigl. Der prieff ist geben nach Krissty gepurde viertzehenhundert jare und im ainsundachtzigkyssten jare am suntag Oculy in der vassten.