Dem erbirdigen in got und geystlichen herrn Johannsen, abbt zw Lambach meinem genadigen lieben herrn enpewt ich Lienhart zw Aschach in Kchalhaimer pharr mein gehorsam auch willig dienst wevor an und fueg ewren gnaden zw wissen, das ich kauflichen verkawfft habe ain funft taill eribschafft und gerechtikait an und auf dem guet, da der Ekker auffn siczt zw Oberenfuert gelegen in Kalhaimer pharr und in Erlinger gericht, dy selb eribschafft pringt ein funft taill auss ainem drittail aus dem obemelten guet, auch mit sambt ein funft taill meiner eribschafft aus einem drittail auf dem Piersteyg ungeverlich, alles mit seiner rechtlichenn zwegehorung nicht da von wesundert, und das selb alles eribrecht ist von ewrn gnaden und dem wirdigen gotzhaws Lambach, dy selb obenant mein eribschafft und auch gerechtikait hab ich zw kawffen geben zw stattem ebigem kawff meinem lieben sun dem Hannsen zw Aschach, Dorothea seiner hawsfrawn und allen iren eriben, dy sy haben und gewingen, und meinem lieben aidem Hannsen am Altenhoff, Elsbethen seiner hawsfrawen und auch allen irer baider eriben, dy sy haben und gebinngen, dar umben sy mir ein guetz volligs wenugen tan haben mit einem summ geltz, dar an mich yczunt und auch fueran mich und mein eriben wolbenugen scholl und der zw rechter zeyt und weil von in weczalt bin worden an allen abgang und schaden. Auff soliches pitt ich ewch in dienmutigen vleis, so dew fuer ewr gnadt kommen mit dem offen meinen betbrieff und wegern wellet in und iren eriben solichen kawff westatten und vertigen mit ewer gnaden anhangunden insigel, wes sew zw stattem kawff und ganczer verczicht nach lanndes und des gotzhaws rechten darumben wedurffen, und so ewr gnad das tuet, so dann dankch ich ewrn gnaden und gelub mit mein trewn aides form fuer mich und all ander mein eriben und meniklichs in krafft des petbrieffs in ewr gnaden insigel weder ewer gnaden nachkommen nichtz ze reden in kainerlay weis und schikk ewrn gnaden zw urkundt den offen pettbrieff gepetschafften durch meiner vleissiger pet willen mit des ersamen Stephan Nuspawmer zw Kyrichdorff ewr genaden ambtman aufgedrukten petch^aft, ym und sein eriben an schaden und unengolten ewer und dem wirdigen gotzhawss an allen rechten in allen sachen. Zewgen des kawffs und der peth umb brieff und insigel sein dy erbern Michel Kukengast zw Gaspolczhoven und Wolfgangen schulmaister zw Gaspolczhoven und Urbann Grintlawcher und ander lewt mer. Datum am sambcztag nagst nach phingsten anno domni etc. lxxxiii^o jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 20f, Nr. 3021