Wir Fridreich von Gots gnaden Romischer kaiser zu allen czeiten merer des reichs, zu Hungern, Dalmacien, Croacien etc. kunig, herczog zu Osterreich, zu Steir etc. embieten unsern lieben getrewn Jorigen von Egkharczaw, Veiten von Eberstorff, obristen kamerer in Osterreich, unsern reten und anndern unsern lanndtlewten, so zu innemen der aufsleg zu beczallung der gelltschuld vom landt geordent sein, und Jorigen von Pottendorff obristen schennkhen daselbs in Osterreich, auch unnserem rate Hannsen von Plannkhenstain, unserm diener Casparn von Rogendorff unnserm kamrer und zu Ybbs und Hainrichen Pruschinkh zum Sermyngstain unsern phlegern, allen unnsern mauttern und ambtlewten desselben unnsers furstentumbs Osterreich, den dienstlewten, so auch umb ir beczallung auf die aufsleg daselbs geschafft und geweist sein, und den innemern des aufslags zu Tiernstain unnser gnad und alles gut. Als man dem ersamen geistlichen unnsern lieben andechtigen dem abbt und convent zu Lambach das gegenwurtigen jars zwainczig dreiling irer gewondlich anczall weins hinauf auf der Tunaw zu irn und irs gotshaws notdurfften furn, dabey ew diser unnser brief geczaigt wirdet, emphelhen wir ew allen und ewr yedem besunder ernstlich und wellen, das ir den bemelten closterlewten die berurt anczall weins zu Wienn, zum Kallnperg, zu Hollnburg, zu Tiernstain, zu Melkch, zu Heberstorff und zum Sermyngstain, auch allenthalben, wo ew der berurt aufslag innzenemen vergunnt ist, und an allen unnsern mauttsteten mauttfrey, aufslegfrey und an alle annder irrung und hindernuss furfarn lasset, so sol ew unnsern reten auch den obbemelten unnsern lanndtlewten von Plannkhenstain, von Rogendorff, Pruschinkh und den dienstlewten das an ewer beczallung kain manngel bringen und an schaden sein. Daran tut ir unnser ernstliche maynung. Geben zu Grecz an phincztag nach sannd Michelstag anno Domini etc. lxxxiii etc. unnsers kaisertumbs im zwayunddreissigisten jar.

Commissio domini imperatoris propria