Dem erwirdigen in got und geistleichen herren her Johanns, abt zw Lambach meinem genadigen herren enpewt ich Marigret und Lienhart des Pwllinger puriger zw Swans saling tachtter mein willig dinst wevor. Ich fueg ewern genaden zw wissen, das ich verkawft hab all mein eribschaft und gerechtikait, so ich gehabt hab in dem aigen lant Nydern Enttaren mit aller zuegehorung gelegen in Gebalczchirer phar, das hab ich zw kauffen geben meinem lieben vettern Wolfgang dem Fleischaker zw Haslach und Kathrein seiner hawsfraw und allen iren payden eribn, nun pit ich ewr genad mit allem und wesundern vleis, ewr genad well sew und ir eriben mit brief und sigel nach allen notturften dar uber versarigen und so ewr genad das getan hat, so glob ich ewern genaden mit mein trawn an aid stat fur mich und all mein eriben, das wir ewern genaden noch dem goczhaws hin fur darumb nicht einreden wellen weder wir noch niemant von unser wegen und schikch ewern genaden des zw urkund den offen petbrief verpetschaft mit des erbarn weissen Steffan Nuspawmer zw Chirichdorf ewrer genaden ambtman aigen aufgedruchten petschaft, den ich mit vleis dar umb gepetten hab, doch im und sein eryben an schaden. Zeung der gepet umb das petschaft sein dy erbarn Wolfgang Pilich, Veicht Fleischaker, Hanns Peken, all drey puriger zw Hag und mer frumer leyt genug. Der brief ist geben am erytag nach sand Kolmans tag anno etc. lxxxiii jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 46, Nr. 3045