Fridreich von gots gnadn romischer kaiser etc.

Ersamer geistlicher lieber andechtiger. Als wir unsern lieben getrewn Sigmunden Pruschinkh, obristen drugsess in Steir unserm hofmarschalh und kamrer und Hainrichen Pruschinkh seinem bruder unserm phleger zum Sermingstain ain antzal salltz von Gmunden mauttfrey und aufslagfrey ze furn vergunnt und erlaubt nach lautt unserr brief darumb ausganngen, haben sy uns anbracht, wie dasselb salltz am Stadl gesawmbt und nicht gefurdert werde, des sy sich beswert bedunkhen und uns nicht gevellt, und emphelhen dir ernstlich und wellen daz du ernstlich darob seist und allen vleis habst, damit das berurt saltz daselbs am Stadl gefurdert und das von dann gefurt werde, daran tust du unser ernstliche maynung. Geben zu Gretz an mittichen nach sannd Ursula tag anno domini etc. lxxxiii unsers kaisertumbs im zwayunddreissigisten jare.