Dem erwierding geistlichen herrenn herren Johannsenn abbt zw Lambach meinem genadigen herrenn enpewt ich Hanns zw Rewtting auss Otnanger phar, Anna sein hausfraw unser willig unnd gehorsam dienst bevor. Wier fuegen ewer genaden zw wyssenn, das wir recht und redlich verkauft unnd kauflich zu kauffen geben haben unnsern lieben prueder Leonhartten Schuester zw Lebraczhaym, Anna seynner hausfraun unnd allen iren payden eriben, so wir habenn oder gewingen unnsern geleichen taill, so wir ungeverlich haben ann dem halben lechenn zw Ernstperig inn Swannser phar gelegen unnd ist das drittail im den halben lechen geleich halbs umb ainn summa gelt, der wir von im zw rechtten tagen an allen schaden recht unnd redlich schon bezalt seinn wordenn. Unnd senndenn ewern genadenn darumben dew offenn betzettel, das ewr genad unnsern lieben bruder obgenandt seynner hausfrawn und allen iren paiden eriben ein gewondlichenn lanndtleuffing kaufbrieff darumben geben unnd mit ewern insigel ververtigen unnd bestatten. Unnd wenn ewr genad dem das alzo gethann hat, so geloben wir ewern genaden und ewern genaden gotzhaws fur unns unnd all unnser eriben inn ewr brieff unnd sigel auch vertigung nichtz zw reden noch annders vonn unnsern wegen yemanndt pey unnsern trewn aydes weyss angever. Wier verzeichenn unns auch des obgenantten unnsers geleichen taill an dem obftgenantten drittaill geleich halbs fur mich und all mein eriben inn ewigew furczicht, das wir darzue noch darnach kain zuespruch noch noch vodrungen nymermer sollen noch wellen haben weder mit recht noch an recht geistlich noch weltlich, ausgenomen unns gab den der tod icht rechtlich, des verzeich wier unns icht alles treulich ungeverlich. Unnd senden ewern genaden darumben dew offen petzettel, bewardt durch unnsers vleissigen gepet willen mit der erbern weysen Michel Haslinger, ambtman der obgenantten herschaft, unnd Hannss Haslinger, aynner des ratz unnd purger zu Swanns, payder aufgedrukchtten petschadt, doch inn unnd iren payden eriben an schaden, daruntter wir unns mit unnsern trewn aydes weys verpintten alles war und stat zw haltten inhalt des briefs. Zewgen und gepet umb das insigel auch umb die petschadt sind die erbern weyssen Jorig Sparrer, Jorig Storer zu Riczling, Leonhart Lewtnar zw Awfhaym und ander erber lewtt meniger. Gebenn nach Cristi geburdt tausentt vierhundertt unnd darnach im vierundachzigisten jar ann phincztag nach reminiscere in der vastten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 85f, Nr. 3076