Dem erwierdigen geystlichn herrn herrenn Johannsenn abbt zw Lambach unsern genadign herrn enpewt ich Veit von Stetten in Rewthaymer phar und Hannss von Sykchinger inn Regar phar unnser willig unnd gehorsam diennst bevor. Wier fuegen ewrn genaden zw wyssen, das wir unns annemben und anngenomen haben ann stat Kathrei des Fruewierth zw Aw erben gesessen saling kindt inn Reuthaimer phar unnd haben zw kauffen geben dem erbern Leonhart Mairhofer, burger zw Swanns, Ursula seynner hausfraun und allen iren paiden eriben iren geleichen eribtail, so sy ungeverlich gehabt hat ann dem Mitter guett zw Aw mit aller zuegehorung gelegen in Rewthaymer phar, das den dienstpar ist ewern genaden unnd ewrn genaden gotzhauss umb ain summa geltz, der wier an stat des kindtz do fuer wier unns angenomen haben, recht unnd redlich schon peczalt sein wordenn. Unnd sennden ewern genaden als gerhaben des kindtz dew offen petzettel, das ewr genad dem obgenantten Leonhartten Mairhoffer, seynner hausfraw Ursula unnd allen iren paiden eriben ain gewandlichenn lanndlewffing kaufbrieff darumben gebt unnd mit ewern innsigel ververtigt unnd bestat, unnd wen ewr genad das also gethann hat, so geloben wier als gerhaben ann stat des kincz reht ewch unnd ewern genaden gotzhauss inn ewr brieff unnd sygel nichtz zw reden noch annders yemanndt vonn unnsern wegen. Wir verzeichen unns auch als gerhaben ann stat des kindtz des obgenanntten seynner geleichenn eribtail ann dem obgenantten guet fur sein unnd all sein eriben inn ewige furczicht, das wier darzue noch darnach chain zuespruch noch vodrung nymmer mer sollen noch wellen haben weder mit recht noch an recht geistlich noch weltlich noch annders yemandt von unnsern wegen alles treulich und ungeverlich. Unnd senndt ewern genaden darumben dew offenn petzettel pewardt durch meiner vleissigen gepet willen mit der erbern weyssen Michel Haslinger zw Obernholczhaym, ambtman der herschaft Lambach, und Hanns Haslinger aynner des ratz unnd burger zw Swanns baider auffgedrukchttenn petschadt, doch inn unnd iren paiden eriben auch der herschaft Lambach ann iren diensten unnd vodrungen an schaden, daruntter wir unns als gerhaben des kindtz mit unnsern trewn aydes weys verpinden alles war und stat zw haltten innhalt des briefs. Zewgen und gepet umb dew petschadt, auch umb das in sigel ann dem kaufbrieff sind dew erbern Wolfganng amb Annger, Michel Slussch zw Puebenlanndt, Hanns Rubein zw Olsdorff unnd annder erber lewtt meniger. Gebenn nach Cristi gebuertt tausennt vierhundert unnd darnach im vier unnd achzigisten jar an freitag vor invocavit.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 78-80, Nr. 3074