Dem erwirdigen in Got und geystlichen herren herrn Johanns abbt von Lambach meinem genadigen herren enpeutt ich Barbara Hannsen Zayninger an der Zayninger mul eelich hausfraw etwan Michel Schneider zu Stainsulcz, Elspet seiner hausfraw seling eelich tochter, mein diemutig willig dinst zuvoran und fueg ewern genaden ze wissen, das ich mich nach meins hauswirts und frumer leutt rat gein meiner lieben muemen Barbara etwan Veytten Reyschel von Aw seling tochter und allen iren eriben umb all mein vaterlichsn und mueterlichs erbschaft und gerechtickait, so ich gehabt habe an und auf dem Reyschelguet ze Aw aller seiner rechtlichen zugehorunngen on Eferdinger pfarr Aschachwinckl lanndgericht gelegn und ewer genaden gotshaws dinspars und verlehents guet ist um ain sum gellts verczigen habe, ausgenomen ob mir oder meinen eriben der tod hinfur icht rechtlichen gibt, sein wir unverczigen, bitt ich ewr genad als meinen genadigen herren in sunderm allem vleys, wellet mit ewer genaden insigel der egenanten Barbara und allen iren eriben ain gewondlichen verczeichbrief nach ewer genaden gotshaws und lanndes ob der Ens rechten von mir und meinen eriben ausgeund verttigen und bestatten, ist mein gutlich will. So ewr genad das getan, gelob ich ewern genaden hinfur in ewer genaden insigel und bestattunng nichts zu reden noch gestatten getan werde, sunder in treulicher diemutickait zu verdiennen. Zu urkunde dicz petbriefs besigelt durch meiner vleyssiger pete willen mit der erbern weysen Michael Nesseltaler, die zeit statrichter zu Eferding und Wolfganng Tierpolczperger, die zeit daselbes aigen aufgedruckten insigel, in baiden, iren eriben und insigeln an schaden und an ewer genaden vordrunng lehenschaft und gerechtickait unengolten, under die insigel ich fur mich all mein eriben mit meinen trewen aidewegs verpinde stat zu hallten nach zu geen und ingedenckh sein innhallt des briefs. Zeugen und tadinger sind gewesen Hanns Schmermair ze Steinsulcz, Hanns Weber daselbs, Jorig Zeller aus der Grafenaw ob Passaw und annder leutt mer. Geben an pfincztag sand Aydten tag nach Kristi geburd vierczehenhundert und vier und achtzigissten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 67f, Nr. 3065