Dem erwurdigen und geistlichen herrn herrn Johannsn abtt zu Lambach enpewnt ich Anna, des Sigmuden Zartl zu Prukch saling tochter mein willig dinst zuvor. Genadiger herr, es kumbt zu ewrn genaden mein lieber prueder Wolfgang mit ain verczichbrieff, dem ewr genad woll vernemen wirt mit seiner inhalt umb mein eribschaft, so ich habt hab an dem guet zu nidern Puechlewten gelegen in Schondorffer pharr. Also pit ich ewer genad mit allen vleyss, ewr genad well den verczeichbrieff mit ewern genaden anhangunden insigel bestaten und vertigen, und wann ewr genad das also getan habt, so gelob ich ewrn genaden obgenante Anna in ewr genaden insigel nicht zu reden in kainerlay weys an aides stat ungevarlichen. Und des zu urkundt gib ich ewern genaden den offen petbrieff verpetschaft mit der erbern Wolfgangen Kranibitmair zu Lochkirichen und Syman Vorhar zu Haidach paider aufgedrukchten petschaft, die ich obgenante Anna mit vleyss darumben gepeten hab, doch in paiden und allen iren eriben an schaden. Zewgen der gepet umb das insigel, auch umb die petschaft Hanns Fraschl auf der Swandt, Michel Lakchenmair zu Lintach, Niclas Mair zu Lewtolsperig und ander frumer lewt genueg. Geben an sand Valntini tag des heiligen martrer anno domini etc. lxxxiiii^o

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 71f, Nr. 3069