Dem erwierdigen unnd geistlichm herrnn herrnn Johannsen abbt zw Lambach unnsern genadigen herrnn ennpewt ich Leonhartt Mesner zw Rustorff unnd ich Caspar und ich Elspett geswistret, des Larenntzen Sneider meines lieben prueder saling kinder, dafur ich mich obgenantter Leonhart anymb wenn dew noch nicht vogtper sindt, unnd ich Petter Strobl zw Lebraczhaym, und ich Kathrei sein hausfraw unnser willig und gehorsam dienst bevor. Wier fuegen ewrn genaden zw wyssen, das wir recht und redlich verkauft und kauflich zw kauffenn gebenn ynnserm lieben vettern unnd swager Micheln zw Oberndorff auf dem Schachner guet, Barbara seynner hausfraun und allen irn payden eriben all unnser erbschafft unnd gerechttigkait, so wir ungeverlich gehabt haben amb Prantmair guet zu Ernstperig mit aller zwegehorung gelegen inn Swannser phar unnd gehort mit der herschaft ewrn genaden unnd ewrn genaden gotzhauss zue umb ain summa gelt, der wir von inn zw rechtten tagen ann allen schaden recht unnd redlich schon bezalt sein worden, unnd sennden ewrn genaden darumben dew offenn petzettel, das eur genad dem obgenantten unnserm lieben vettern unnd swager unnd seynner hausfraun und allen iren paiden eriben ein gewandlichen landtleuffing kaufbrieff darumben gebt unnd mit ewren insigel ververtigt unnd bestat, unnd wen ewr genad das den also gethann hat, so geloben wir ewern genaden unnd ewern genaden gotzhauss fur unns unnd all unnser eriben ewern genaden inn eur brieff unnd sigel auch vertigung nicht zw reden pey unnsern treuen aydes weys noch annders yemandt von unnsern wegen angevor. Wir verzeichenn unns auch alle obgenandt unnser geleichenn eribschafft unnd gerechttigkait, so wir ungeverlich gehabt haben an dem obgenantten guet mit aller zuegehorrung fur unns und all unnser eriben inn ewigew furzicht, das wir darzue noch darnach kain zuespruch noch vodrungen nymmer mer sollen noch wellen haben weder mit recht noch an recht, geistlich noch weltlich noch annders yemandt von unnsernn wegen, ausgenomen unns gab den der tod icht rechtlich, des verzeichen wir unns nicht, alles treulich ungeverlich, unnd geben ewrn genaden dew offen petzettel bewardt durch unnser vleissigen gepet willen mit der erbern weyssen Micheln Haslinger zw obern Holczhaim, ambtman der obgenantten herschafft unnd Hannsen Haslinger aynner des ratz unnd burger zw Swanns payder aufgedrukchtten petschadt, doch inn unnd iren paiden eriben, auch der herschafft ann ir vodrungen unvergriffenlich und an schadenn, untter dew petschadt wir unns alle obgenandt mit unnsern treuen aydes weys verpintten, alles war und stat zw haltten inhalt des briefs. Zeugen unnd gepet umb dew petschadt, auch umb das insigel an den kaufbrieff sind die erbern Michel Frodel aynner des ratz und burger zw Swanns, Hanns Wolfhutter burger doselbs, Mert zw Wispach unnd annder erber leut meniger. Geben nach Cristi gepuerdt tausent vierhundertt unnd darnach im vierundachzigistenn jar ann mitichen inn den heyling osterfeyertagenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 90-92, Nr. 3082