Dem erwirdigen geistlichen herrn herrn Johannsen, abbt zu Lambach meinem genadign herrn empewt ich Elizabeth Granpergerin, Wolfgangen Granperger zu Hueb saling tochter und Melicharten Mulbanger zu Newtharting elichen hawsfrawn, mein willig dinst. Ich fueg ewern genaden zu wissen, das ich kauflichen zu kauffen geben hab dem erberen Micheln Graffen, burger zw Swans, Barbara seiner hawsfrawn und allen iren paiden erben meinen zehent klain unnd grossen, so ich gehabt hab auf dem hoff genant der Prehaffen hof gelegen in Gaspatzhofer pharr und in Starhenberger gericht, der den von ewern genaden zu lehen rurt nach innhaltt ains kaufbriefs, den ich im darumben geben hab, Darauf bit ich euch mit sunderm vleis ewr gnad well dem vorbenanten Graffen seiner hawsfrawn und iren baiden erben den benanten zehennt leyhen und bestattung daruber geben. So ewr genad das also gethan hat, gelob ich ewern genaden in ewr lehenschaft und bestattung nichts zu reden und schickh ewern genaden darumben die offen pettzetel bestat und bezewgt mit meins obenanten Melicharten Mulbanger meines lieben hawswirts aufgedruckhten pettschaft, den ich mit vleis darumben gepeten hab, darunder ich mich verpindt bey meinen trewn an aide alles war und statt zu hallten innhallt der pettzetel, die geben ist, do man zallt nach Cristi gepurd tausent vierhundert und im vyer und achtzigistenn jare an sambstag nach der heyling dreyer kunig tag

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 63, Nr. 3062