Dem erwierdigenn geistlichenn herrenn herrenn Johannsenn, abbt zw Lambach, unnserm genadigenn herrnn enpewtt ich Elspet des Pettern zw Hueb auss Tesselprunner phar, unnd ich Barbara Joringen Huebmer zu Teyttenhaim elichew hausfraw unnser willig und gehorsam diennst bevor. Wier fuegenn ewrn genaden zw wyssen, das wir recht unnd redlich uber gebenn habenn unnsern liebenn swestter Anna, des Sigmunden Rottelperget etbenn gesessen inn Ottnannger phar saling gelassenn witib unnsern geleichenn mueterlichen eribtaill, so unns zuegemell und zuesturib wenn sy vergeet ann dem Smidt guetlein zw Perig inn Tessellprunner phar gelegen, unnd gehort mit der herschafft ewern genaden unnd ewern genaden gotzhauss zue, inn solher maynung unnd beschaiden, das sy unnser liebew muetter Elspet dew alt Smidin zw Perig soll zw irn hantten einnemen inn ir behaussung und sey mueterlich unnd treulichenn darumb ir lebtag, sy leb lanng oder kuercz, nerenn unnd nach iren abganngk, was ir des guettleins uber belib, das soll unnser lieben swester und iren eriben ledigklichen nach voligen und beleiben an allew irrung. Unnd senden ewern gnaden darumben den offen petzettel das ewr genad der obgenantten unnser lieben swester ein gewandlichenn ubergabbrieff darumb gebt und mit ewern gnaden insigel ververtigt und bestat. Unnd wen ewr genad den das alzo gethan habt, so gelobenn wir ewrn gnaden fur unns und all unnser eriben ewern genaden und ewrn gnaden gotzhaus in ewr brieff unnd sigel auch vertigung nicht zw reden noch annders yemandt von unnsern wegen pei unnsernn treun aides weys angever, unnd geben ewern gnaden darumben dew offenn petzettel bewardt durich unnser vleissigenn gepet willen mit des erbern Sigmunden Haslinger zw Obernholczhaim, ambtman der obgenantten herschaft unnd mit des erbern weysen Hannsen Haslinger, ayner des ratz unnd purger zw Swanns payder aufgedrukchtten petschadt, doch in unnd iren paiden eriben an schaden, daruntter wir unns mit unnsern treun aides weys verpintten alles war und stat zu haltten inhalt der zettel. Zeugen unnd gepet umb dew petschadt auch umb das insigel an den ubergabbrieff sind die erbern Jacob zw Moshaim, Ruepprecht zw Yebing, Hannss zw Nyderpergaring unnd ander erber lewt meniger. Geben nach Cristi unnsers hernn geburdt tausent vierhundert und darnach im vierundachzigisten jar ann suntag vor sannd Thomanstag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 116-118, Nr. 3101