Wir Fridreich von gots gnaden romischer kaiser, zu allenntzeitn merer des reichs, zu Hungern, Dalmacien, Croacien etc. kunig, hertzog zu Osterreich, zu Steyr etc., embieten unserm getrewn Jorgen Kirchperger zu Egenperg unnser gnad und alles gut. Als wir dir vormals der zwitrecht und irrunghalben, so sein zwischen dein ains und des ersamen geistlichen unserer lieben andechtigen n. des abbts und convent zu Lambach des anndern tails, von ainer vischwaid wegen auf der Albm geschriben und bevolhen haben, dich auf den montag nach sannd Symon und sannd Judas tag yetzkomenden gen Gretz zefugen, so wollten wie derselben zwittrechthalben ew beder seit horen, und verrer darinn was billich ist hanndlen nach lawt unserr brief darumb ausganngen. Emphelhen wir dir ernstlich und wellen, daz du dich auf den mittichen nach allerheiligen tag yetzkomenden zu uns fugest, oder dein volmechtigen gwallt mit gnugsamer underrichtung deiner gerechtikait, so du zu der berurten vischwaid zu haben mainest, an deiner stat schikhest, do dann der benant von Lambach auch sein sol. So wellen wir ew derselben vischwaidhalben horen oder schaffen zu horen und darin verrer was billich und recht ist hanndeln. Daran tust du unser ernstlich maynung. Geben zu Lynntz an eritag vor sannd Symon und sannd Judas tag der heiligen zwelfboten anno domini etc. lxxxiiii unsers kaisertumbs im drewunddreissigisten jare.