Dem erwierdigen geistlichem herrnn herrnn Johannsenn abbt zw Lambach, unnserem genadign herrenn enpewtt ich Leonhart Mairhoffer, burger zw Swanns, unnd ich Ursula sein hausfraw, unnser willig dienst bevor. Wir fuegen ewrn genaden zw wissenn, das wir recht unnd redlich verkaufft unnd kauflich zw kauffen geben habenn denn erbern Steffann zw Aw, Magdalena seynner hausfraun unnd allen irn paiden eribenn, dew sy habenn oder noch chunfftigklich gewingen, unnser guet zw Aw, genandt das Mitterguet mit aller zuegehorung gelegen inn Rewthaymer phar, unnd gehortt mit der herschafft ewrn genaden unnd ewrn genaden gotzhawss zwe umb ain summa gelt, der wir von inn zw rechten tagen an allen schaden recht unnd redlich schon bezalt sein worden. Unnd senden ewern genaden darumben denn offenn aufgab unnd unnd petbrieff, das ewr genad dem obgenantten Steffan und seynner hausfraun unnd irn paiden eriben ein gewandlichen landtleuffing kaufbrieff darumb gebt und mit ewrm insigel ververtigt und bestat. Und wen ewr genad das den alzo gethan hat, so geloben wir eurn genaden fur unns und unnser eriben euch unnd ewrn genaden gotzhauss inn ewr brieff und sigel auch vertigung nicht zw reden noch annders yemandt vonn unnsern wegen alles treulich ungeverlich. Unnd gib ewrn genaden darumben dew offenn petzettel bewardt mit meinem obgenantten Leonhartten Mairhoffer aignen aufgedrukchten insigel, daruntter ich mich obgenanttew Ursula mit meinen treun verpint zw sampt mein hauswiert stat zw halttenn inn halt der zettel. Zeugen unnd gepett umb das insigel auch denn kaufbrieff sind die erbern Mertt Wufinger, Hanns Haslinger und Larenntz Aichinger, all drei burger zw Swanns unnd ann der erber lewtt meniger. Geben nach Cristi unnsers herrn geburdt tausent vierhundert und darnach im funffundachzigisten jar ann freitag nach sannd Blasienn tag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 120f, Nr. 3103