Dem erwierdignn geistlichnn herrenn herrenn Johannsnn, abbt zw Lambach, unnserm genadignn herrn, enpewt ich Leonnhartt Nydernnawer zw Nydernnaw, burger zw Swannss, mein willig unnd gehorsam dienst bevor. Ich fueg ewernn genadenn zw wyssenn, das ich zw der zeit und ich es rechtlich woll gethan mocht, recht unnd redlichenn ubergebenn, auch ubergib inn krafft der zettel vonn sunder lieb unnd trew, dew er mir beweist hatt, auch von wegen seynner jardienst, dew ich schuldig pin gewesenn, meinem liebenn vettern Hannsenn Haslinger burger zw Swanns, Warbara seinner hausfraun und irn baiden eriben, dew sy haben oder chunftctigklich gewingen, unnser guettel, gelegenn zw Lebraczhaim inn Swannser phar mit aller seynner zuegehorung unnd gehortt mit der herschafft euch und ewern genaden gotzhauss zue, darumben sew den sand Michel gotzhauss zw Swanns zw den paw sollen ausrichtten zechenn phunt phening landtgabiger munss innhalt ayner geschafft zettel darumben ausganngen. Unnd senndt ewern genaden darumben das offenn petzettel, das ewr genad dem obgenanttenn Haslinger, seinner hausfraun unnd irn paiden eribenn ein gewondlich lanndleuffing ubergabrieff darumben gebt unnd mit ewern genaden insigel ververtigt unnd bestat, und wen ewr genad denn das alzo gethan hat, so gelob ich ewrn gnaden unnd ewrn genaden gotzhauss fur mich unnd all mein eriben euern genaden inn ewr brieff und sigel, auch vertigung nicht zw reden noch annders yemandt von unnsern wegen pei unnsern treun aydes weys angever. Unnd gib ewrn genaden darumben dew offenn petzettel bewardt durch meiner vleissigen gepet willen mit der erbern Leonhartten Mairhoffer, aynner des ratz unnd burger zw Swanns unnd Larennzen Aichinger burger daselbs paider aufgedrukchtten petschad, doch in und irn payden eriben an schaden, daruntter ich mich verpindt mit meinen treun aydes weys alles war und stat zw haltten inhalt der zettell. Zeugen und gepet umb dew petschadt auch umb das insigel an denn ubergabrieff sind die erbern Taman Neittel zu Perkchaym, Michel Krotlinger zw Krotling, paid aus Talhaymer phar, und Michel zw Ernstperig unnd annder erber leut meniger. Geben nach Cristi gepurdt tausent vierhundert unnd darnach im funffundachzigistten jar ann sambstag nach sand Dorothea tag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 122f, Nr. 3105